​ഗുജറാത്തിൽ വൻ ലഹരിവേട്ട: 1,800 കോടിയുടെ മയക്കുമരുന്ന് പിടികൂടി

അഹമ്മദാബാദ് : ​ഗുജറാത്തിൽ വൻ ലഹരി വേട്ട. 1,800 കോടി രൂപ വില മതിക്കുന്ന 300 കിലോ മയക്കുമരുന്ന് പിടികൂടി. അറബിക്കടലിൽ ഉപേക്ഷിച്ച നിലയിലാണ് മയക്കുമരുന്ന് കണ്ടെത്തിയത്. ​ഗുജറാത്ത് ഭീകരവാദ വിരുദ്ധ സ്ക്വാഡും കോസ്റ്റ് ​ഗാർഡും നടത്തിയ സംയുക്ത ഓപ്പറേഷനിലാണ് രാജ്യത്തെ തന്നെ വലിയ മയക്കുമരുന്ന് വേട്ട നടന്നത്. അറബിക്കടലിലെ ഇന്റർനാഷണൽ മാരിടൈം ബൗണ്ടറി രേഖയ്ക്കു സമീപം ഏപ്രിൽ 12,13 തിയതികളിയായിരുന്നു സംയുക്ത ദൗത്യം.

കോസ്റ്റ് ​ഗാർഡ് കപ്പൽ കണ്ടതോടെ ലഹരിക്കടത്ത് സംഘം മയക്കുമരുന്ന് ഉപേക്ഷിച്ച് രക്ഷപെടുകയായിരുന്നുവെന്നാണ് വിവരം. പിടികൂടി.ത് മെത്താംഫെറ്റമിനാണെന്ന് കരുതുന്നതായും കൂടുതൽ പരിശോധനകൾക്കായി അയച്ചിട്ടുണ്ടെന്നും കോസ്റ്റ് ​ഗാർഡ് ഔദ്യോ​ഗിക വൃത്തങ്ങൾ പറഞ്ഞു. മാരിടൈം ബൗണ്ടറി രേഖയ്ക്കു സമീപം സംശയാസ്പദമായ സാഹചര്യത്തിൽ ബോട്ട് നിർത്തിയിട്ടിരിക്കുന്നതുകണ്ടാണ് കോസ്റ്റ് ​ഗാർഡ് പരിശോധനയ്ക്കെത്തിയത്. കോസ്റ്റ് ​ഗാർഡിന്റെ കപ്പൽ കണ്ടതോടെ മയക്കുമരുന്ന് കടലിൽ ഉപേക്ഷിച്ച് സംഘം രക്ഷപെടുകയായിരുന്നു.