കേന്ദ്രസർക്കാർ രാജ്യത്തിന്റെ ശബ്ദം കേൾക്കണം : സിപിഐ എം

ന്യൂഡൽഹി

അഖിലേന്ത്യ പണിമുടക്ക്‌ വിജയമാക്കിയ തൊഴിലാളിവർഗത്തെ സിപിഐ എം പൊളിറ്റ്‌ബ്യൂറോ അഭിവാദ്യംചെയ്തു. വിവിധയിടങ്ങളിൽ പണിമുടക്കിയ തൊഴിലാളികൾക്കുനേരെ പൊലീസ്‌ ലാത്തിചാർജ്‌ നടത്തിയതായി റിപ്പോർട്ടുണ്ട്‌. ഭീഷണിപ്പെടുത്തി പണിമുടക്കിൽനിന്ന്‌ പിന്തിരിപ്പിക്കാനുള്ള ശ്രമമുണ്ടായി. ഇത്തരം ആക്രമണങ്ങളെയെല്ലാം നേരിട്ടാണ്‌ പണിമുടക്ക്‌ വിജയിപ്പിച്ചത്‌.

കർഷകരും കർഷകത്തൊഴിലാളികളും ബഹുജനങ്ങളും പണിമുടക്കിനെ പിന്തുണച്ചും ഐക്യദാർഢ്യം അറിയിച്ചും രംഗത്തുവന്നു. തൊഴിലാളികൾക്കൊപ്പം നിലയുറപ്പിച്ച്‌ പണിമുടക്ക്‌ വൻവിജയമാക്കിയ എല്ലാവരെയും സിപിഐ എം അഭിനന്ദിക്കുന്നു. തൊഴിൽചട്ടങ്ങൾക്കും അതിലെ തൊഴിലാളിവിരുദ്ധ നയങ്ങൾക്കുമെതിരായി രാജ്യമെങ്ങും ഉയർന്ന ശബ്‌ദം കേൾക്കാൻ കേന്ദ്രസർക്കാർ തയ്യാറാകണം. തൊഴിൽചട്ടങ്ങളിൽ വരുത്തിയ ഭേദഗതികൾ പിൻവലിക്കുകയും തൊഴിലാളികളുടെ അവകാശങ്ങൾ സംരക്ഷിക്കുകയും വേണം–- പിബി ആവശ്യപ്പെട്ടു.