നാ​ഗ്പൂരിൽ പലയിടങ്ങളിലും കർഫ്യൂ: 50 പേരെ അറസ്റ്റ് ചെയ്തതായി പൊലീസ്

മുംബൈ : മു​ഗൾ ചക്രവർത്തി ഔറം​ഗസേബിന്റെ ശവകുടീരം പൊളിക്കണമെന്നാവശ്യപ്പെട്ട് നാ​ഗ്പൂരിൽ സംഘർഷം. നിരവധി വീടുകളും കടകളും അക്രമികൾ തകർത്തതായി പൊലീസ് പറഞ്ഞു. സംഭവവുമായി ബന്ധപ്പെട്ട് ഇതുവരെ 50 പേരെ അറസ്റ്റ് ചെയ്തതായും അഞ്ച് എഫ്ഐആർ രജിസ്റ്റർ ചെയ്തതായും പൊലീസ് അറിയിച്ചു. നിലവിൽ സ്ഥിതി​ഗതികൾ നിയന്ത്രണ വിധേയമാണെന്നും അധികൃതർ പറഞ്ഞു. സംഘർഷത്തിൽ 34 പൊലീസ് ഉദ്യോ​ഗസ്ഥർക്കും അഞ്ച് പ്രദേശവാസികൾക്കും പരിക്കേറ്റതായി അധികൃതർ അറിയിച്ചു. 45 വാഹനങ്ങളും സംഘർഷത്തിൽ തകർക്കപ്പെട്ടു.

തിങ്കളാഴ്ചയാണ് സെൻട്രൽ നാ​ഗ്പൂരിലെ ചിട്നീസ് പാർക്ക് ഏരിയയിൽ സംഘർഷം ആരംഭിച്ചത്. തീവ്രഹിന്ദുത്വ വാദികളാണ് മു​ഗൾ ഭരണാധികാരി ഔറം​ഗസേബിന്റെ ശവകുടീരം പൊളിക്കണമെന്നാവശ്യപ്പെട്ട് പ്രക്ഷോഭം ആരംഭിച്ചത്. ബിജെപി നേതാക്കൾ ശവകുടീരം പൊളിക്കണമെന്ന ആഹ്വാനം ചെയ്തതിനു പിന്നാലെയാണ് തീവ്ര ഹിന്ദു സംഘടനകൾ അക്രമം അഴിച്ചുവിട്ടത്. വിശ്വഹിന്ദു പരിഷത് (വിഎച്ച്പി), ബജ്റംഗ്ദൾ സംഘടനകളാണ് രം​ഗത്തെത്തിയത്. ആർക്കിയോളജിക്കൽ സർവേ ഓഫ് ഇന്ത്യയുടെ സംരക്ഷണത്തിലുള്ള ചരിത്രസ്മാരകമാണ് ഔറം​ഗസേബിന്റെ ശവകുടീരം.