മഹാരാഷ്ട്രയിൽ മുഖ്യമന്ത്രിയുടെ ചികിത്സാ സഹായ ഫണ്ടിൽ നിന്ന് പണം തട്ടി: ഡോക്ടർമാർക്കെതിരെ കേസ്

മുംബൈ : മുഖ്യമന്ത്രിയുടെ ചികിത്സാ സഹായ ഫണ്ടിൽ നിന്നും ലക്ഷങ്ങൾ തട്ടിയെന്ന പരാതിയിൽ മൂന്ന് ഡോക്ടർമാർക്കെതിരെ കേസ്. താനെ ജില്ലയിലാണ് സംഭവം. സഹായ ഫണ്ടിൽ നിന്നും 4.75 ലക്ഷം രൂപയാണ് ഡോക്ടർമാർ തട്ടിയത്. വ്യാജ രേഖകളും രോ​ഗികളുടെ വിവരങ്ങളുമൊക്കെ നിർമിച്ചായിരുന്നു തട്ടിപ്പ്. സംഭവം വിവാദമായതോടെ ഇക്കണോമിക് ഒഫൻസ് വിങ് കേസ് അന്വേഷണം ആരംഭിച്ചു.

കഴിഞ്ഞ വർഷം മെയ്, ജൂൺ, ജൂലൈ മാസങ്ങളിലാണ് തട്ടിപ്പ് നടന്നത്. ഡോ. അനുദുർ​ഗ് ധോനെ, ഡോ. പ്രദീപ് ബാപു പാട്ടീൽ, ഡോ. ഈശ്വർ പവാർ എന്നിവരാണ് പിടിയിലായത്. 13 രോ​ഗികളുടെ പേരും ചികിത്സ വിവരങ്ങളും ആശുപത്രി രേഖകളുമാണ് ഇവർ വ്യാജമായി ഉണ്ടാക്കിയത്. സെക്ഷൻ 420, 406, 471 വകുപ്പുകൾ പ്രകാരമാണ് കേസ് രജിസ്റ്റർ ചെയ്തത്.