​ഹൊസൂരിൽ ടാറ്റ ഇലക്ട്രോണിക്സ് നിർമാണക്കമ്പനിയിൽ വൻ തീപിടിത്തം

ചെന്നൈ
തമിഴ്‌നാട്‌ ഹൊസൂരിൽ ടാറ്റയുടെ ഇലക്‌ട്രോണിക്‌ നിർമാണ യൂണിറ്റിൽ ഉണ്ടായ വൻ തീപിടിത്തത്തിൽ വ്യാപക നഷ്‌ടം. നാഗമംഗലം ഉദാനപള്ളിയിലെ നിർമ്മാണശാലയിൽ പുലർച്ചെ 5.30 നാണ്‌ അപകടമുണ്ടായത്‌. സംഭവ സമയത്ത്‌ 1500 തൊഴിലാളികൾ ഉണ്ടായിരുന്നെങ്കിലും ആളപായമില്ല. മൊബൈൽ ഫോൺ സാമഗ്രികൾ നിർമ്മിക്കുന്നിടത്താണ്‌ തീപിടിത്തം ആരംഭിച്ചത്‌. ശ്വാസതടസം നേരിട്ട മൂന്നു തൊഴിലാളികൾ ആശുപത്രിയിൽ ചികിത്സയിലാണ്‌. നില ഗുരുതരമല്ല.

അഗ്നിശമനസേന മണിക്കൂറുകൾനീണ്ട പരിശ്രമത്തിനൊടുവിൽ തീ നിയന്ത്രിച്ചു. തീപിടിത്തത്തിന്റെ കാരണം വ്യക്തമല്ല. അന്വേഷണം ആരംഭിച്ചതായി പൊലീസ്‌ അറിയിച്ചു.