വേലിക്കകത്ത് വീട്ടിൽ, സ്‌നേഹപ്പൂക്കളുമായി

ആലപ്പുഴ

വി എസ് ഓണമുണ്ടിരുന്ന വേലിക്കകത്ത്‌ വീട്; അദ്ദേഹത്തിന്റെ ഉച്ഛ്വാസം തങ്ങിനിൽക്കുന്ന വീട്‌. അവിടേക്ക്​ അവസാനമായി എത്തിയപ്പോൾ, മണിക്കൂറുകളായി വരിയിൽനിന്നവർ കണ്ഠം പൊട്ടുമാറ് വിളിച്ചു - " പുന്നപ്രയുടെ പോരാളീ, ആരു പറഞ്ഞു മരിച്ചെന്ന്, ജീവിക്കുന്നു ഞങ്ങളിലൂടെ' മുഷ്‌ടികൾ വാനിലേക്കുയരുന്ന കാഴ്‌ച.

വിലാപയാത്ര രാവിലെ ഏഴോടെ ആലപ്പുഴ ജില്ലയിൽ പ്രവേശിച്ചെന്ന വാർത്ത എത്തിയപ്പോൾമുതൽ പുന്നപ്ര വേലിക്കകത്ത് വീടിന്​ മുന്നിൽ ആളുകൾ വരിനിന്നു. വിപ്ലവമണ്ണിലേക്ക് അവസാനമായി എത്തിയ നായകനെ കാണാൻ വഴിനീളെ ജനസമുദ്രം തിരയടിച്ചു. വീട്ടിലെത്താൻ 22 മണിക്കൂറെടുത്തു.

ഉറക്കമൊഴിച്ച്‌ പതിനായിരങ്ങളാണ്​ വീട്ടുപരിസരത്ത് കാത്തുനിന്നത്​. പകൽ പന്ത്രണ്ടോടെ, പുന്നപ്ര വയലാറിന്റെ വീരനായകന്റെ മൃതദേഹം വീട്ടിലേക്കെത്തിയപ്പോൾ ഓരോ മണൽത്തരിയും മനസും ത്രസിച്ചു. ആദ്യം വീട്ടിനുള്ളിൽ കുടുംബാംഗങ്ങൾക്ക്​ മാത്രമായി കാണാൻ അൽപ്പനേരം. ശേഷം വീട്ടുമുറ്റത്തേക്ക്​. വീടിന്​ മുന്നിലെ ക്യൂ കിലോമീറ്ററുകൾ നീണ്ടു.

ഭാര്യ വസുമതിയും മകൾ ആശയും ചൊവ്വാഴ്‌ച വീട്ടിലെത്തിയിരുന്നു. മകൻ വി എ അരുൺകുമാർ വി എസിന്റെ മൃതദേഹത്തിനൊപ്പവും. സിപിഐ എം ജനറൽ സെക്രട്ടറി എം എ ബേബി, സംസ്ഥാന സെക്രട്ടറി എം വി ഗോവിന്ദൻ എന്നിവർ വീട്ടിലെത്തിയിരുന്നു.