കണ്ണൂരിൽ പിരിച്ചു തകർത്തു ; മുണ്ടക്കൈ ഫണ്ടിന്റെപേരിൽ വൻവെട്ടിപ്പ്‌

കണ്ണൂർ

യൂത്ത്​ കോൺഗ്രസിന്റെ മുണ്ടക്കൈ ഫണ്ടിന്റെപേരിൽ കണ്ണൂരിൽ വൻവെട്ടിപ്പ്‌. ജില്ലയിലെ 11 ബ്ലോക്കു കമ്മിറ്റികൾ ഫണ്ട്‌ പിരിച്ചിട്ടും സംസ്ഥാന കമ്മിറ്റിക്ക്‌ കൊടുത്തത്‌​ രണ്ട്​ ബ്ലോക്കിൽനിന്നുള്ള അഞ്ചുലക്ഷം രൂപമാത്രം. ബാക്കി ഒമ്പതുബ്ലോക്ക്‌ പിരിച്ച ലക്ഷങ്ങളെക്കുറിച്ച് ഒരുവിവരവുമില്ല. രണ്ടരലക്ഷം രൂപ​ ഓരോ ബ്ലോക്കും നൽകണമെന്നാണ്​ സംസ്ഥാന കമ്മിറ്റി നിർദേശം. ഒമ്പത്​ ബ്ലോക്കിൽനിന്ന് 22.50 ലക്ഷം രൂപ കിട്ടാനുണ്ടെന്നാണ്‌ ​ഇവരുടെ അവകാശവാദം.

സംസ്ഥാന, ജില്ലാ ഭാരവാഹികൾ പലരും സ്വന്തം നിലയിൽ ഫണ്ട്​ പിരിച്ചെന്നും​ ആരോപണമുണ്ട്.​ ഇരിക്കൂർ, പയ്യന്നൂർ ബ്ലോക്കുകളാണ്​ രണ്ടരലക്ഷം വീതം​ അടച്ചത്​. ഇരിക്കൂറിൽ പിരിച്ചതിന്റെ കണക്കെത്രയാണെന്ന്​ അറിയാമെന്നും കൂടുതൽ കാര്യങ്ങൾ പറയിപ്പിക്കരുതെന്നുമുള്ള ഡിസിസി ജനറൽ സെക്രട്ടറി കെ സി വിജയന്റെ വെല്ലുവിളിയോടെ അതും വിവാദത്തിലായി.

ബ്ലോക്ക്​ കമ്മിറ്റികൾ നേരിട്ട്​ സംസ്ഥാന കമ്മിറ്റിക്ക്​ പണമടയ്ക്കാൻ നിർദേശിച്ചത്​ നേതാക്കൾ സുവർണാവസരമാക്കി. എവിടെയും കണക്ക്​ കാണിക്കേണ്ട എന്നതിനാൽ പിരിച്ചുതകർത്തു. നിർദേശിച്ചതിലേറെ ഫണ്ട്​ പിരിച്ചുവെന്നാണ്​ പ്രധാന നേതാക്കൾതന്നെ രഹസ്യമായി പറയുന്നത്​.

പയ്യന്നൂർ ബ്ലോക്കിൽ പിരിവുമായി ബന്ധപ്പെട്ടുണ്ടായ ചർച്ചയ്ക്കിടെ സംസ്ഥാന ഭാരവാഹിയായ വനിതാ നേതാവിനെതിരെ രൂക്ഷ വിമർശമുയർന്നു. ഇവർ നേരിട്ട്​ ഫണ്ട്​ പിരിച്ചതാണ്​ അംഗങ്ങൾ ഉന്നയിച്ചത്​​.