ഫൈനൽ ലൈനപ്പിൽ നടുഭാഗം, നിരണം, മേൽപ്പാടം, വീയപുരം; നെഹ്‌റുട്രോഫിയിൽ ആര് മുത്തമിടും

വെബ് ഡെസ്ക്

Published on Aug 30, 2025, 03:43 PM | 1 min read

ആലപ്പുഴ: വള്ളംകളി ആവേശം വാനോളമുയർത്തി പുന്നമടയുടെ നെട്ടായത്തിൽ ജലരാജാക്കന്മാരുടെ മാമാങ്കത്തിന് തുടക്കം. 71–ാമത്‌ നെഹ്‌റുട്രോഫി വള്ളംകളി ടൂറിസം മന്ത്രി മുഹമ്മദ് റിയാസ് ഉദ്ഘാടനം ചെയ്തു. ആർപ്പുവിളിയും ആരവങ്ങളുമായി പതിനായിരങ്ങളാണ് വള്ളംകളിക്ക് സാക്ഷിയാകാനെത്തിയിരിക്കുന്നത്. കാത്തിരിപ്പിന്‌ വിരാമമിട്ട്‌ പുന്നമടയിൽ ഉടൻ പുതിയ കായൽ രാജാവ്‌ ഉദിച്ചുയരും.

21 ചുണ്ടനുകളടക്കം 71 കളിവള്ളങ്ങളാണ് ഇക്കുറി മത്സരിക്കുന്നത്‌. മൂന്ന്‌ ചുരുളൻ, അഞ്ച്‌ ഇരുട്ടുകുത്തി എ, 18 ഇരുട്ടുകുത്തി ബി, 14 ഇരുട്ടുകുത്തി സി, അഞ്ച്‌ വെപ്പ്‌ എ, മൂന്ന്‌ വെപ്പ്‌ ബി, തെക്കനോടി തറയും തെക്കനോടി കെട്ടും ഒന്നുവീതം എന്നിങ്ങനെയാണ്‌ ചെറുവള്ളങ്ങൾ. ഉദ്‌ഘാടനത്തിന്‌ ശേഷം മാസ്‌ഡ്രില്ല് നടന്നു. തുടർന്ന്‌ ചുണ്ടൻ വള്ളങ്ങളുടെ ഹീറ്റ്‌സിന് തുടക്കം. ആനാരി, വെള്ളംകുളങ്ങര, ശ്രീവിനായകൻ, കാരിച്ചാൽ എന്നീ വള്ളങ്ങളാണ് ഹീറ്റ്സിലുള്ളത്.

പിന്നാലെ ചെറുവള്ളങ്ങളുടെ ഫൈനൽ മത്സരവും ആരംഭിക്കും വൈകിട്ട്‌ നാലോടെ ചുണ്ടൻ വള്ളങ്ങൾ കലാശപ്പോരിനിറങ്ങും. ആറ്‌ ഹീറ്റ്‌സുകളിലായി 21 ചുണ്ടൻമാർ മാറ്റുരയ്‌ക്കുന്ന മത്സരത്തിൽ മികച്ച സമയംകുറിക്കുന്ന നാല്‌ ചുണ്ടൻമാരാണ്‌ ഫൈനൽ യോഗ്യത നേടുക. കനത്ത സുരക്ഷാ സന്നാഹങ്ങളാണ്‌ ജലമേളയ്‌ക്കായി ഒരുക്കിയിരിക്കുന്നത്‌. കുറ്റമറ്റ ഫലപ്രഖ്യാപനം നടത്താനുള്ള സജ്ജീകരണങ്ങൾ ഒരുക്കിയിട്ടുണ്ട്.

പ്രതികൂല കാലാവസ്ഥ പ്രതീക്ഷിച്ചാണ്‌ ആഗസ്‌ത്‌ രണ്ടാം ശനിയെന്ന കീഴ്‌വഴക്കം മാറ്റിവച്ച് മത്സരം 30ന് നടത്താൻ തീരുമാനിച്ചത്. സ്റ്റാർട്ടിങ്, ഫിനിഷിങ് സംവിധാനങ്ങൾ വെള്ളി പകൽ പരിശോധിച്ച്‌ കൃത്യത ഉറപ്പാക്കി. പൂ‌ർണമായും ഹരിതചട്ടം പാലിച്ചാണ് മത്സരം . മന്ത്രി പി പ്രസാദ്‌ ഉദ്‌ഘാടന ചടങ്ങിൽ അധ്യക്ഷനായി. മന്ത്രിമാർ, ജനപ്രതിനിധികൾ തുടങ്ങിയവർ പങ്കെടുത്തു.