പ്രതികാരച്ചുങ്കത്തിൽ കയറും കുരുങ്ങും

ആലപ്പുഴ: പ്രതികാരച്ചുങ്കത്തിൽ പകച്ച്​ കയർമേഖലയും. സംസ്ഥാനത്ത് സ്വകാര്യ, പൊതുമേഖലകളിലായി 60ഓളം സ്ഥാപനങ്ങളാണ്​ അമേരിക്കയിലേക്ക് കയർ ഉൽപ്പന്നം കയറ്റി അയയ്ക്കുന്നത്​. സൊസൈറ്റികളും സ്വകാര്യ ചെറുകിട യൂണിറ്റുകളുമടക്കം 560ന്​ മുകളിൽ ഉൽപാദന യൂണിറ്റ്‌ പ്രവർത്തിക്കുന്നുണ്ട്​. മേഖലയിലെ പ്രശ്​നങ്ങൾ ചർച്ച ചെയ്യാൻ ഫെഡറേഷൻ ഓഫ്​ ഇന്ത്യൻ കയർ എക്​സ്​പോർട്ടേഴ്​സ്​ അസോസിയേഷൻ ട്രേഡ്​ യൂണിയനുകളുമായി വ്യവസായ മന്ത്രി പി രാജീവിന്റെ നേതൃത്വത്തിൽ യോഗം ചേരാൻ തീരുമാനിച്ചു. ഇതിനായി ട്രേഡ് യൂണിയൻ നേതാക്കൾക്ക്​ കത്ത്​ നൽകി.

​തീരുവ കൂട്ടിയ ആദ്യഘട്ടത്തിൽ കയറ്റുമതി സ്ഥാപനങ്ങളും ഇറക്കുമതി ചെയ്യുന്നവരും പരസ്​പരം സഹകരിച്ചും നഷ്​ടം വീതിച്ചെടുത്തിരുന്നു. എന്നാൽ, 50 ആയാൽ നഷ്​ടം ഏറ്റെടുക്കാൻ സാധിക്കില്ലെന്നാണ്​ വ്യവസായികൾ പറയുന്നത്​. കയറ്റുമതി നിലച്ചാൽ, അമേരിക്കയിൽ സിന്തറ്റിക്​ ഉൽപന്നങ്ങൾ വിപണി കീഴടക്കും. ഇത്‌ ഗുണമേന്മ കുറഞ്ഞ ഉൽപ്പന്നങ്ങളുണ്ടാക്കുന്ന രാജ്യങ്ങൾക്ക്‌​ നേട്ടമാകും. അവരുടെ ഉൽപ്പന്നങ്ങൾ സ്ഥിരമായിക്കഴിഞ്ഞാൽ ഇന്ത്യയ്ക്ക്​ അമേരിക്കൻ വിപണിയിലേക്ക്​ തിരിച്ചുപോക്ക്​ സാധ്യമല്ല.

തീരുവ ഉയർത്തിയ​ ശേഷം, ​നേരത്തെ നൽകിയ ഓർഡറുകൾ പോലും ഒഴിവാക്കിയ അമേരിക്കൻ കമ്പനികളുണ്ട്​. കയറ്റുമതിയും നടപടികളും താൽക്കാലികമായി നിർത്തിവയ്ക്കാനാണ്​ ചില കമ്പനികളിൽനിന്ന്​ ലഭിച്ച അറിയിപ്പ്​. ഇതുവഴി 70 മുതൽ 100 ശതമാനം വരെ നിർമാണം പൂർത്തിയായ ഉൽപ്പന്നങ്ങൾ തടഞ്ഞുവയ്​ക്കേണ്ടി വരുന്നു​.