കെടിയുവിൽ ഇഷ്ടക്കാരനെ രജിസ്ട്രാറാക്കി താൽക്കാലിക വിസി

തിരുവനന്തപുരം: എ പി ജെ അബ്ദുൾ കലാം സാങ്കേതിക സർവകലാശാലയിൽ വീണ്ടും അമിതാധികാര പ്രയോ​ഗവുമായി താൽക്കാലിക വൈസ് ചാൻസലർ. പ്രൈവറ്റ് സെക്രട്ടറിയായിരുന്ന ജി ​ഗോപിന് രജിസ്ട്രാറുടെ അധിക ചുമതല നൽകിയുള്ള ഉത്തരവ് പുറത്തിറക്കി. സിൻഡിക്കറ്റ് മുഖേന നടപ്പാക്കേണ്ട നിയമനം, ഇല്ലാത്ത അധികാരം ഉപയോ​ഗിച്ച് നടപ്പാക്കുകയാണ്. ഈ നിയമനം അടുത്തതായി ചേരുന്ന സിൻഡിക്കറ്റ് യോ​ഗം അം​ഗീകരിച്ചാലേ ഗോപിന് തുടരാൻ കഴിയുകയുള്ളു. സിൻഡിക്കറ്റ് യോ​ഗം ചേരാൻ ഡോ. കെ ശിവപ്രസാദ് തയ്യാറാകാത്തതിനാൽ മൂന്നുമാസമായി സർവകലാശാലാ രജിസ്ട്രാർ കസേരയൊഴിഞ്ഞുകിടക്കുകയാണ്‌. ഒഴിവുവന്ന തസ്തികകളൊന്നും യഥാസമയം റിപ്പോർ‌ട്ട് ചെയ്യാനും ശിവപ്രസാദ് തയ്യാറായിരുന്നില്ല.

സർവകലാശാലയിൽ സിൻഡിക്കറ്റ് യോ​ഗം ചേർന്ന് തീരുമാനങ്ങളെടുത്തിട്ട് ഒമ്പത് മാസമായി. ഒക്ടോബറിലാണ് അവസാനമായി പൂർണതോതിൽ സിൻഡിക്കറ്റ് ചേർന്നത്. അം​ഗങ്ങളുടെ നിരന്തര ആവശ്യത്തെ തുടർന്ന് ജനുവരിയിൽ യോ​ഗം ചേർന്നിരുന്നു. എന്നാൽ, കോൺ​ഗ്രസ് സംഘടനാ നേതാവിന്റെ പിഎഫ് തിരിമറി ചർച്ചചെയ്യണമെന്ന അം​ഗങ്ങളുടെ ആവശ്യം അം​ഗീകരിക്കാതെ യോ​ഗം പിരിച്ചുവിടുകയും തീരുമാനങ്ങളെല്ലാം റദ്ദാക്കുകയുമായിരുന്നു. ഇതിനുശേഷം സിൻഡിക്കറ്റ് ചേരണമെന്ന് ആവശ്യപ്പെട്ടെങ്കിലും വിസി തയ്യാറായിട്ടില്ല. ബജറ്റുമായി ബന്ധപ്പെട്ട വോട്ട് ഓൺ അക്കൗണ്ട് പാസാക്കാൻ സ്പെഷ്യൽ സിൻഡിക്കറ്റ് മാത്രമാണ് ശിവപ്രസാദിന്റെ കാലയളവിൽ ചേർന്നത്.