മലപ്പുറത്ത്‌ പിവിസി പൈപ്പിനുള്ളിൽ വടിവാളുകൾ; കിട്ടിയത്‌ കുട്ടികൾക്ക്‌

മലപ്പുറം: മമ്പാട് ' കാട്ടുപൊയിൽ ആൾ ഒഴിഞ്ഞ സ്ഥലത്തു നിന്ന്‌ കുഴിച്ചിട്ട നിലയിൽ അഞ്ച് വടിവാളുകൾ കണ്ടെടുത്തു. പിവിസി പൈപ്പിൽ സൂക്ഷിച്ച നിലയിലാണ് വടിവാളുകൾ കണ്ടെത്തിയത്. വടിവാളുകൾ തുരമ്പ് എടുത്ത നിലയിലാണ്. 4 വർഷമെങ്കിലും പഴക്കമുള്ള വാളുകളാണെന്നാണ് പൊലീസിന്റെ നിഗമനം.

വാളുകൾക്ക്‌ 58 സെന്റിമീറ്റർ വരെ നീളമുണ്ട്‌. ഇന്നലെ വൈകുന്നേരം 6.30 ഓടെ കാട്ടുപൊയിലിൽ കുട്ടികൾ കളിക്കാൻ മൈതാനം ഉണ്ടാക്കാൻ വേണ്ടി കിളക്കുമ്പോൾ തൂമ്പ പിവിസി പൈപ്പിൽ തട്ടുകയായിരുന്നു. ഇത് തുറന്ന് നോക്കിയപ്പോഴാണ് വടിവാൾ കണ്ടത്. പൊലീസ് സ്ഥലത്ത് എത്തി വാടിവാളുകൾ കസ്റ്റഡിയിൽ എടുത്തു. നിലമ്പൂർ പൊലീസ്, ഫോറൻസിക് വിഭാഗം, വിരലടയാള വിദഗ്ധർ, ബോംബ് സ്ക്വാഡ് എന്നിവർ പരിശോധന നടത്തി.