ടിക്കറ്റ്​ ക‍ൗണ്ടർ 
നിർത്താൻ റെയിൽവേ ; എം–യുടിഎസ് സംവിധാനം വ്യാപിപ്പിക്കും

ആലപ്പുഴ

റെയിൽവേ സ്​റ്റേഷനുകളിലെ ടിക്കറ്റ്​ ക‍ൗണ്ടറുകൾ പൂർണമായി നിർത്താനുള്ള നടപടി ത്വരിതപ്പെടുത്തി റെയിൽവേ. റിസർവേഷനില്ലാത്ത ടിക്കറ്റ്​ നൽകാനായി മൊബൈൽ ടിക്കറ്റിങ്​ മെഷീനുകൾ (എം–യുടിഎസ്​) എല്ലാ സ്​റ്റേഷനുകളിലും വ്യാപിപ്പിക്കാനാണ്​ നീക്കം. ഇത്തരം മെഷീനുകൾ 50,000 രൂപ നിക്ഷേപമായി നൽകി ആർക്കും നടത്തിപ്പ്​ അവകാശം നേടാം. ഇവരെ ‘ഫെസിലിറ്റേറ്റർമാർ’ എന്ന പേരിലാണ്​ പരിഗണിക്കുക. കമീഷൻ അടിസ്ഥാനത്തിലാണ്​ ഇവർക്ക്​ വരുമാനം ലഭിക്കുക. കേരളത്തിലെ പ്രധാന സ്റ്റേഷനുകളിൽ ഇവ നിലവിൽ വന്നു. രാജ്യവ്യാപകമായി ഇ‍ൗ സംവിധാനം വിപുലീകരിക്കാനാണ്​ കേന്ദ്രസർക്കാർ പദ്ധതി. റെയിൽവേ മന്ത്രാലയം ജൂൺ 26 ന് ഇതിനായുള്ള സർക്കുലർ ​ പുറത്തിറക്കിയിരുന്നു.

എം–യുടിഎസ്​ വ്യാപകമാക്കിയശേഷം, ടിക്കറ്റ്​ ക‍ൗണ്ടറുകളിൽ ജോലി ചെയ്യുന്ന കമേഴ്​സ്യൽ ക്ലർക്കുമാരെ ട്രെയിനുകളിൽ ടിക്കറ്റ്​ പരിശോധനക്ക്​ നിയമിക്കാനാണ്​ നീക്കം. ഫലത്തിൽ പുതിയ നിയമനം ഉണ്ടാകില്ല. യുവാക്കളുടെ തൊഴിൽ അവസരം ഇല്ലാതാക്കുന്നതാണ്​ നടപടി. തെരഞ്ഞെടുത്ത തസ്​തികകളിൽ നിയമനംവേണ്ടെന്നും ജീവനക്കാരുടെ പുനർവിന്യാസവും ലേബർ കോൺട്രാക്​ട്​ വ്യവസ്ഥയും മതിയെന്നാണ്​ റെയിൽവേ നയം.

ഓൺലൈൻ ടിക്കറ്റിങ്ങിനായി റെയിൽവേ രണ്ട്​ ആപ്പ്​ പുറത്തിറക്കിയിരുന്നു. സ്ലീപ്പർ ടിക്കറ്റുകൾ ഇപ്പോൾ തിരുവനന്തപുരം, പാലക്കാട്​ ഡിവിഷനുകളിൽ ക‍ൗണ്ടറുകൾ വഴി കൊടുക്കുന്നില്ല. ഇത്​ ക‍ൗണ്ടറുകളെ ആശ്രയിക്കുന്നത് കുറയ്​ക്കാൻ ലക്ഷ്യമിട്ടാണ്​. എം യുടിഎസുകൾ വഴി സെക്കൻഡ്​ ക്ലാസ്​ ടിക്കറ്റുകൾ വരെ മാത്രമേ ലഭിക്കൂ. ആപ്പുകളും ഓൺലൈൻ സംവിധാനവും ഉപയോഗിക്കാൻ പ്രയാസമുള്ളവർ കൂടുതൽ ബുദ്ധിമുട്ടിലാകുമെന്നതാണ്​ സ്ഥിതിയെന്ന്​ റെയിൽവേ ഉദ്യോഗസ്ഥർതന്നെ വിശദീകരിക്കുന്നു.