പാലക്കാട്‌ ട്രെയിനിടിച്ച്‌ അച്ഛനും കുഞ്ഞും മരിച്ചു

ഒറ്റപ്പാലം: ചിനക്കത്തൂർ പൂരം കാണാൻ ലക്കിടിയിലെ ബന്ധു വീട്ടിലെത്തിയ ആലത്തൂർ കിഴക്കഞ്ചേരി കാരപ്പാറ പ്രഭു (28)വും, ഒരു വയസായ മകനും ട്രെയിൻ തട്ടി മരിച്ചു. വൈകീട്ട് നാലോടെ ലക്കിടി റെയിൽവെ ഗേറ്റിന് സമീപമാണ് അപകടം.

ചിനക്കത്തൂർ പൂരം കാണാൻ റെയിൽവെ ഗേറ്റിന് സമീപത്തെ ബന്ധുവീട്ടിലെത്തിയ പ്രഭു,കുഞ്ഞിനെയും എടുത്ത് റെയിൽവെ ട്രാക്കുകൾ മുറിച്ച് കടക്കുന്നതിനിടെ ട്രെയിൻ പാഞ്ഞ് വരികയും, അപകടം സംഭവിക്കുകയുമായിരുന്നു. ഒരു ട്രാക്ക് മുറിച്ച് കടന്ന് രണ്ടാമത്തെ ട്രാക്ക് കടക്കാൻ ശ്രമിക്കുന്നതിനിടെയായിരുന്നു അപകടം.

പ്രഭുവിന്റെയും കുഞ്ഞിന്റെയും തലയ്ക്കാണ് ട്രെയിൻ തട്ടിയത്. ഇരുവരും സംഭവസ്ഥലത്ത് വെച്ച് തന്നെ മരിച്ചു. മൃതദേഹങ്ങൾ ഒറ്റപ്പാലം താലൂക്ക് ആശുപത്രി മോർച്ചറിയിലേക്ക് മാറ്റി. ഒറ്റപ്പാലം പൊലീസ് തുടർ നടപടികൾ സ്വീകരിച്ചു.