കരാറുകാരനെ തള്ളി നീതൂസ്​ അക്കാദമി; വീടിന്റെ​ ചെലവ്​ 15 ലക്ഷത്തിലധികം​

കൽപ്പറ്റ: മുണ്ടക്കൈ ദുരന്തബാധിത കുടുംബത്തിന്​ നിർമിച്ചുനൽകിയ 785 സ്​ക്വയർ ഫീറ്റ്​ വീടിന്റെ ചെലവ്​ 15 ലക്ഷം രൂപയിൽ കൂടുതലാണെന്ന്​ നീതൂസ്​ അക്കാദമി. വീട്​ നിർമിച്ച കരാറുകാരന്റെ വാദം തള്ളിയാണ്​ എറണാകുളം ആസ്ഥാനമായ അക്കാദമി രംഗത്തെത്തിയത്​. പ്രകൃതിദുരന്തങ്ങളെ അതിജീവിക്കും വിധം മുണ്ടക്കൈ ട‍ൗൺഷിപ്പിൽ ആയിരം ചതുരശ്രയടിയിൽ സർക്കാർ നിർമിക്കുന്ന വീടും നീതൂസ്​ അക്കാദമി നിർമിച്ച വീടും താരതമ്യം ചെയ്​ത്​ കരാറുകാരൻ സമൂഹമാധ്യമത്തിൽ വ്യാജപ്രചാരണം നടത്തിയിനെ തുടർന്നാണ്​ അക്കാദമി വസ്​തുത വെളിപ്പെടുത്തി ഒ‍ൗദ്യോഗിക ഫെയ്​സ്​ ബുക്ക്​ പേജിൽ കുറിപ്പിട്ടത്​. 15 ലക്ഷം രൂപയ്​ക്ക്​ വീടിന്റെ പണിതീർക്കാൻ കഴിയില്ലെന്നും ഇന്റീരിയർ ഉൾപ്പെടെയുള്ളവയ്​ക്ക്​ കൂടുതൽ തുക വിനിയോഗിച്ചെന്നുമാണ്​ കുറിപ്പ്​​.

മുണ്ടക്കൈ–ചൂരൽമലക്കാരുടെ പേരിൽ രാഷ്​ട്രീയപ്രേരിതമായി കർമസമിതിയുണ്ടാക്കി സർക്കാരിന്റെ പുനരധിവാസ പ്രവർത്തനങ്ങൾക്കെതിരെ തുടക്കംമുതൽ പ്രവർത്തിക്കുന്ന വ്യക്തിയാണ്​ വീട്​ നിർമിച്ച കരാറുകാരൻ. വസ്​തുതകൾ മറച്ചുവച്ചുള്ള ഇദ്ദേഹത്തിന്റെ ഫെയ്​സ്​ബുക്ക്​ പോസ്​റ്റിൽ ദുരന്തബാധിതരും ആളുകളും തെറ്റിദ്ധരിച്ചു. സമൂഹമാധ്യമങ്ങളിൽ വ്യാജപ്രചാരണം ശക്തമായി. ഇതോടെയാണ്​ വീട്​ നിർമിച്ചവർതന്നെ കരാറുകാരനെതിരെ രംഗത്തെത്തിയത്​. ‘ഞങ്ങൾ വീട് പണിയാൻ ഏൽപ്പിച്ച കോൺട്രാക്ടർ വയനാട്ടുകാരനാണ്. എറണാകുളത്തുള്ള കോൺട്രാക്ടറെ കൊണ്ടുപോയി ജോലി ചെയ്യിപ്പിക്കാൻ ബുദ്ധിമുട്ടുണ്ട്. ഇദ്ദേഹത്തിന്റെ ക്വട്ടേഷൻ കണ്ട്​ വർക്ക് ഏൽപ്പിക്കുകയായിരുന്നു. അദ്ദേഹത്തിന്റെ രാഷ്ട്രീയ പശ്ചാത്തലം ഞങ്ങൾക്ക് അറിയില്ലെന്നു’മാണ് നീതൂസ്​ അക്കാദമിയുടെ വിശദീകരണം. ​

സമൂഹത്തോടുള്ള ഉത്തരവാദിത്വത്തിന്റെ ഭാഗമായി ചെയ്​ത കാര്യത്തെ വിവാദങ്ങളിലേക്ക് വലിച്ചിഴയ്​ക്കരുത്​. ഉരുൾദുരന്തം ഉണ്ടായപ്പോൾ മുഖ്യമന്ത്രിയുടെ ദുരിതാശ്വാസ നിധിയിലേക്ക് സംഭാവന നൽകിയിരുന്നു. ഇനിയും സർക്കാർ ചെയ്യുന്ന നല്ല പ്രവർത്തനങ്ങൾക്ക്​ കൂടെയുണ്ടാകുമെന്നും ഇവർ ഫെയ്​സ്​ബുക്ക്​ കുറിപ്പിൽ പറഞ്ഞു.