വിരുന്നിനെത്തിയ നവവരൻ പുഴയിൽ മുങ്ങിമരിച്ചു

കോഴിക്കോട്: ഭാര്യവീട്ടിൽ വിരുന്നിനെത്തിയ നവവരൻ പുഴയിൽ മുങ്ങിമരിച്ചു. കോഴിക്കോട് പേരാമ്പ്ര മേപ്പയൂരിൽ ബഷീർ - റംല ദമ്പതികളുടെ മകൻ മുഹമ്മദ് റോഷൻ ( 24 ) ആണ് മരിച്ചത്. എടരിക്കോട് ചുടലപ്പാറ പത്തൂർ ഹംസക്കുട്ടിയുടെ മകൾ റാഹിബയുമായി കഴിഞ്ഞ 21നായിരുന്നു റോഷന്റെ വിവാഹം.

തിങ്കളാഴ്ച വീട്ടുകാർക്കും ബന്ധുക്കൾക്കുമൊപ്പം കടലുണ്ടി പുഴയിൽ കുളിക്കുന്നതിനിടെയായിരുന്നു അപകടം. കൂടെയുള്ളവർ രക്ഷപ്പെടുത്തി കോട്ടക്കലിലെ സ്വകാര്യ ആശുപത്രിയിൽ എത്തിച്ച് ചികിത്സയിൽ കഴിയവെ ചൊവ്വാഴ്ചയാണ് മരിച്ചത്.