നെഹ്റു ട്രോഫി: നടുഭാ​ഗം, നിരണം ചുണ്ടൻ വള്ളങ്ങൾ മാനദണ്ഡം ലംഘിച്ചതായി പരാതി

ആലപ്പുഴ: നെഹ്റു ട്രോഫി മത്സരത്തിൽ ഹീറ്റ്സിൽ പങ്കെടുത്ത ചുണ്ടൻ വള്ളങ്ങളിൽ അനുവദനീയമായതിലും കൂടുതൽ ഇതര സംസ്ഥാന തുഴക്കാരുണ്ടായിരുന്നുവെന്ന് പരാതി. നടുഭാ​ഗം, നിരണം വള്ളങ്ങളിൽ പ്രൊഫഷണൽ തുഴക്കാരുണ്ടായിരുന്നു എന്നാണ് പരാതി ഉയർന്നത്. പിബിസി, യുബിസി ക്ലബുകളാണ് പരാതി നൽകിയിരിക്കുന്നത്.

25 ശതമാനം പ്രൊഫഷണൽ തുഴച്ചിൽക്കാരാണ് ഒരു ഹീറ്റ്സിൽ അനുവദനീയമായത്. എന്നാൽ നടുഭാ​ഗം ചുണ്ടൻ മാനദണ്ഡം ലംഘിച്ചു എന്നാണ് പരാതി. ഇത് കൃത്യമായി പരിശോധിച്ച് ഫൈനലിലേക്ക് യോ​ഗ്യത നേടിയ നടുഭാ​ഗം ചുണ്ടനെ അയോ​ഗ്യനാക്കണമെന്നാണ് പരാതിയിൽ ക്ലബ്ബുകൾ ആവശ്യപ്പെട്ടിരിക്കുന്നത്.

നടുഭാ​ഗം (4:20.904 സെക്കന്റ്), നിരണം (4.21.269 സെക്കന്റ്), മേൽപ്പാടം (4.22.123 സെക്കന്റ്), വീയപുരം (4.21.810 സെക്കന്റ്) എന്നിവരാണ് ഫൈനൽ ലൈനപ്പിൽ. നടുഭാഗത്തിനെതിരെ നിരണം ബോട്ട് ക്ലബും പരാതി നൽകി. പരാതികൾ പരിശോധിച്ച് നടപടിയെടുക്കുമെന്ന് ആലപ്പുഴ ജില്ലാ കലക്ടര്‍ അറിയിച്ചു.