ലീഗിന്റെ മുണ്ടക്കൈ ഭൂമി തട്ടിപ്പ്​: ‘ഗ്രീൻ പൊളിടിക്​സി’ലും 
പൊട്ടിത്തെറി

കൽപ്പറ്റ: മുണ്ടക്കെെ ദുരിതബാധിതരെ പുനരധിവസിപ്പിക്കാൻ തോട്ടഭൂമി വാങ്ങിയതിൽ മുസ്ലിംലീഗിൽ കലാപം പടരുന്നു. ഭൂമി സംബന്ധിച്ച്​ നേതാക്കൾ നടത്തിയ നുണപ്രചാരണം പൊളിഞ്ഞതോടെ ​ പ്രവർത്തകരിൽ പ്രതിഷേധം കനത്തു. ജില്ലാ നേതാക്കൾ ഉൾപ്പെട്ട ‘ഗ്രീൻ പൊളിടിക്​സ്​’ വാട്​സ്​ആപ്​​ ​​ ഗ്രൂപ്പിൽ അണികളുടെ ചോദ്യശരങ്ങളാണ്​. ജില്ലാ കമ്മിറ്റിയോ പ്രധാന ഭാരവാഹികളോ അറിയാതെ ജില്ലാ ജനറൽ സെക്രട്ടറിയുടെ നേതൃത്വത്തിലുള്ള ഒരുവിഭാഗം നേതാക്കൾ രഹസ്യമായാണ്​ ഭൂമിയിടപാട്​ നടത്തിയതെന്നാണ്​ ആക്ഷേപം​.

തോട്ടഭൂമിയാണ്​ ഏറ്റെടുക്കാൻ പോകുന്നതെന്ന്​ അറിഞ്ഞപ്പോൾ തന്നെ നിയമപ്രശ്​നം പലരും അറിയിച്ചിരുന്നു. ഇതെല്ലാം റിയൽ എസ്​റ്റേറ്റ്​ താൽപ്പര്യമാണെന്ന്​ പറഞ്ഞ്​ അപഹസിക്കുകയായിരുന്നു നേതൃത്വം. സെന്റിന്​ പരമാവധി 15,000–50,000 രൂപ വിലയുള്ള ഭൂമിയാണ്​ സംസ്ഥാന നേതാവിന്റെ ബന്ധുവിൽനിന്ന്​ സെന്റിന്​ 1.22 ലക്ഷം രൂപവരെ മുടക്കിവാങ്ങിയത്​. നിയമതടസ്സമില്ലെന്ന നിലപാട്​ സംസ്ഥാന പ്രസിഡന്റ്​ സാദിഖലി ശിഹാബ്​ തങ്ങളുൾപ്പെടെയുള്ള നേതാക്കൾ ആവർത്തിച്ചു. സ്ഥലം വിറ്റവർ തന്നെ തോട്ടഭൂമിയാണെന്ന്​ സ്ഥിരീകരിച്ചതോടെ നേതാക്കൾക്ക്​ മിണ്ടാട്ടമില്ല. പൊതുജനങ്ങളെയും ദുരിതബാധിതരെയും പാർടി പ്രവർത്തകരെയും കബളിപ്പിച്ചതായാണ്​ ആരോപണം.

ഒരു നേതാവ്​ ഭൂമിയിടപാടിൽ കമീഷൻ പറ്റിയതായ ആക്ഷേപം ഉയർന്നു. ‘ഉടമകൾ തോട്ടഭൂമിയാണ്​ വിറ്റതെന്ന്​ മൊഴികൊടുത്ത സ്ഥിതിക്ക്, ​ തോട്ടഭൂമി എന്തിന്​ ഇത്ര വില കൊടുത്തുവാങ്ങിയെന്നതിന്​ നേതൃത്വം മറുപടി പറയേണ്ടിവരും’ എന്നാണ്​ വാട്​സ്​ആപ്​ ഗ്രൂപ്പിൽ പനമരത്തെ യൂത്ത്​ ലീഗ്​ നേതാവിന്റെ താക്കീത്​. ഇതിനെ അനുകൂലിച്ച്​ നിരവധി പേരെത്തി. ​ അടിയന്തരമായി ലീഗ്​ പ്രവർത്തകസമിതി യോഗം വിളിക്കണമെന്ന ആവശ്യവും ചിലർ ഉന്നയിച്ചു. ദുരന്തബാധിതരുടെ പുനരധിവാസത്തിന്‌ 40 കോടി രൂപയോളമാണ്‌ ജനങ്ങളിൽനിന്ന്‌ ലീഗ്‌ സമാഹരിച്ചത്‌. 12 കോടിയിലധികം സ്ഥലത്തിനായി ചെലവഴിച്ചുവെന്നാണ്​​ നേതൃത്വം പറയുന്നത്​.