"മോട്ടിവേഷൻ സ്പീച്ച് എന്നപേരിൽ നടത്തുന്ന പലതും അത്ര മോട്ടിവേറ്റിങ് അല്ല, ശാസ്ത്രീയ അടിത്തറയില്ല"

തിരുവനന്തപുരം: ലഹരിവിരുദ്ധ പ്രവർത്തനങ്ങൾ ശക്തിപ്പെടുത്തുന്നതിന് വിദ​ഗ്ധരുടെ സേവനങ്ങൾ സർക്കാർ ഉപയോ​ഗപ്പെടുത്തുന്നുണ്ടെന്ന് എക്സൈസ് മന്ത്രി എം ബി രാജേഷ്. എക്സൈസ് വകുപ്പിൽ പരിശീലനം നൽകിയ ഉദ്യോ​ഗസ്ഥർക്ക് പുറമെ സൈക്യാട്രിസ്റ്റുകളും സൈക്കോളജിസ്റ്റുകളും ഉൾപ്പെടെയുള്ള വിദ​ഗ്ധരും വിമുക്തി പദ്ധതിയുടെ ഭാ​ഗമായി പ്രവർത്തിക്കുന്നുണ്ടെന്നും മന്ത്രി പറഞ്ഞു. സ്കൂൾ വിദ്യാർഥികൾക്ക് ലഹരി വിരുദ്ധ സന്ദേശം നൽകുന്നതിൽ മോട്ടിവേഷൻ സ്പീച്ച് എടുക്കുന്നവരെ ഉൾപ്പെടുത്തുമോ എന്ന അൻവർ സാദത്ത് എംഎൽഎയുടെ ചോദ്യത്തിന് നിയമസഭയിൽ മറുപടി നൽകുകയായിരുന്നു മന്ത്രി.

എക്സൈസ് ഉദ്യോ​ഗസ്ഥർ ക്ലാസ് എടുക്കുമ്പോൾ കുട്ടികൾ അലക്ഷ്യമായി ഇരിക്കുകയാണെന്നും, മോട്ടിവേഷൻ സ്പീച്ച് എടുക്കുന്നർ വരികയാണെങ്കിൽ എല്ലാവരും കേൾക്കുമെന്നുമായിരുന്നു അൻവർ സാദത്തിന്റെ നിർദേശം.

നിർദേശം തള്ളിക്കളയുക അല്ലെന്നും എന്നാൽ, മോട്ടിവേഷൻ സ്പീച്ച് എടുക്കുന്ന എല്ലാവരെയും ഉപയോ​ഗപ്പെടുത്താൻ കഴിയില്ലെന്നും മന്ത്രി മറുപടി നല്‍കി. പലർക്കും ശാസ്ത്രീയ അടിത്തറയില്ല. അത്ര മോട്ടിവേറ്റിങ് അല്ല പലരുടെയും ക്ലാസുകൾ. ആ രം​ഗത്തെ വിദ​ഗ്ധരായവരെ ഉപയോ​ഗപ്പെടുത്തുന്നതിൽ തടസമില്ല. ലഹരി വിരുദ്ധ പ്രവർത്തനങ്ങളെ ഏകോപിപ്പിക്കുന്നതിന്റെ ഭാ​ഗമായി എല്ലാ മേഖലയിലെയും വിദ​ഗ്ധരുടെ സമ്മേളനം നടത്തിയിരുന്നു. മികച്ച പ്രതികരണമാണ് അതിൽ ലഭിച്ചത്. എല്ലാ വിദ​ഗ്ധരുടെയും സേവനം നിലവിൽ ഉപയോ​ഗപ്പെടുത്തുന്നുണ്ടെന്നും മന്ത്രി മറുപടി നൽകി.