മടിക്കൈ : ചുവപ്പ്​ തുടിക്കുന്ന നാട്​ , കമ്യൂണിസ്​റ്റ്​ ഭരണചരിത്രത്തിന്​ 75 വർഷം

നീലേശ്വരം

സംഘശക്തിയുടെ ചങ്കുറപ്പിലാണ്​​ മടിക്കൈ 75 വർഷംമുമ്പ്​ ആ ചുവന്ന ചരിത്രമെഴുതിയത്​. ജന്മിത്വവും നാടുവാഴിത്തവും കൊടികുത്തിവാണ മലബാറിലെ കുഗ്രാമം ഒറ്റനാൾകൊണ്ട്​ ലോകമെമ്പാടുമുള്ള ജനതയ്​ക്ക്​ അതിശയ ദേശമാകുകയായിരുന്നു. ജന്മിവാഴ്​ചയുടെ അസ്ഥിവാരമിളക്കി​​ 1950 ജൂലൈ 14ന്​ മടിക്കൈ പഞ്ചായത്ത്​ ഭരണസമിതിയിലേക്ക്​ 16 കമ്യൂണിസ്​റ്റുകാർ എതിരില്ലാതെ ജയിച്ചുകയറി. ചോദ്യംചെയ്യാൻ ആരുമില്ലെന്നു​കരുതിയ ഫ്യൂഡൽ വാഴ്​ചയുടെ വായടപ്പിച്ചുകളഞ്ഞു ആ മുന്നേറ്റം. ഏച്ചിക്കാനം ജന്മി പറയുന്നവരെ ഉൾപ്പെടുത്തി ഭരണസമിതിയുണ്ടാക്കുന്ന പതിവാണ്​ അന്ന്‌ കീഴ്​മേൽ മറിഞ്ഞത്​. മടിക്കൈയുടെ ചുവപ്പൻ പടയോട്ടം ഇടർച്ചയില്ലാതെ ഇന്നും മുന്നോട്ട്​.

എല്ലാവിഭാഗം ആളുകളെയും ഉൾപ്പെടുത്തിയുള്ള പട്ടികയുമായി ഇരുനൂറോളം കമ്യൂണിസ്റ്റ് –കർഷകസംഘം പ്രവർത്തകർ സംഘടിച്ച്‌ അന്ന്‌ ഏച്ചിക്കാനം തറവാട്ടിലെത്തി. ആരും വരില്ലെന്നു​ കരുതിയ ജന്മിയുടെ കണക്കുകൂട്ടൽ തെറ്റി. കമ്യൂണിസ്റ്റ്‌ പാർടി മുൻകൂട്ടി തയ്യാറാക്കിയ പട്ടിക തെരഞ്ഞെടുപ്പിനെത്തിയ ഉദ്യോഗസ്ഥർക്ക് കൈമാറി. പകരം പട്ടികപോലും നൽകാനാകാതെ അന്തിച്ചുനിന്നുപോയി ജന്മി. കമ്യൂണിസ്‌റ്റ്‌ പാർടിയുടെ പട്ടികയിലുള്ളവരെല്ലാം എതിരില്ലാതെ തെരഞ്ഞെടുക്കപ്പെട്ടതായി പ്രഖ്യാപിക്കേണ്ടിവന്നു. തെരഞ്ഞെടുക്കപ്പെട്ട അംഗങ്ങൾചേർന്ന്, കർഷകസംഘം നേതാവ്​ കനിംകുണ്ടിൽ അപ്പുകാരണവരെ പ്രസിഡന്റായും നാര ചൗക്കറെ വൈസ് പ്രസിഡന്റായും തെരഞ്ഞെടുത്തു.

ഇത്തരം അനേകം ചെറുത്തുനിൽപ്പുകളിലൂടെയാണ്​ മടിക്കൈയ്​ക്ക്​ പിന്തുടർച്ചയുണ്ടായത്​. രാജ്യത്ത്‌ ആദ്യമായി ജനകീയ ഇടപെടലിലൂടെ ജന്മിത്വം അവസാനിപ്പിച്ച മണ്ണാണിത്​. കേരളത്തിൽ ഭൂപരിഷ്കരണനിയമം നടപ്പാകുന്നതിനും 20 വർഷംമുമ്പേ മടിക്കൈയിലെ കൃഷിക്കാർ വാരവും പാട്ടവും നൽകുന്നത് നിർത്തിയിരുന്നു. എ കെ ജി, ഇ കെ നായനാർ, ടി എസ് തിരുമുമ്പ്, കെ മാധവൻ, എ വി കുഞ്ഞമ്പു, വി വി കുഞ്ഞമ്പു, കെ എ കേരളീയൻ, എൻ ജി കമ്മത്ത് തുടങ്ങിയ നേതാക്കൾക്കെല്ലാം ഒളിത്താവളമൊരുക്കിയ നാടാണിത്​.

1946ൽ ദേശാഭിമാനി ഫണ്ടുപിരിവിന്‌ മടിക്കൈ അമ്പലത്തുകരയിൽ എത്തിയ എ കെ ജി, കാട്ടിൽനിന്ന്‌ തോലും തലയിലേറ്റിവരുന്ന സ്‌ത്രീകളെ ഏച്ചിക്കാനം ജന്മിയുടെ കാര്യസ്ഥൻ തടഞ്ഞുവച്ചത്​ കണ്ടു. കാട്ടിൽനിന്ന്‌ അരിയുന്ന തോല്‌ ജന്മിയുടെ വയലിൽ ഇടണമെന്നാണ്‌ കീഴ്‌വഴക്കം. ഇത്‌ ചോദ്യംചെയ്​ത എ കെ ജി​ തോല്‌ സ്‌ത്രീകളുടെ തലയിലേറ്റിയതും ചരിത്രം.

മടിക്കൈ ഉൾപ്പെടുന്ന നീലേശ്വരം ദ്വയാംഗ മണ്ഡലത്തിൽനിന്ന്​ ജയിച്ചാണ്​ 1957ൽ ഇ എം എസ്​ കേരളത്തിന്റെ ആദ്യ മുഖ്യമന്ത്രിയായത്​. കല്ലളൻ വൈദ്യരാണ്​ ഇ എം എസിനൊപ്പം അന്ന്​ ജയിച്ചത്​. മുക്കാൽ നൂറ്റാണ്ടാകുന്ന​ കമ്യൂണിസ്‌റ്റ്‌ ഭരണസാരഥ്യം മടിക്കൈയെ സമസ്​തമേഖലയിലും കേരളത്തിന്റെ നെറുകയിലെത്തിച്ചു. സിപിഐ എം നേതൃത്വത്തിൽ നടക്കുന്ന 75–ാം വാർഷികാഘോഷം വെള്ളി വൈകിട്ട്​ നാലിന്​ കാലിച്ചാംപൊതിയിൽ ജനറൽ സെക്രട്ടറി എം എ ബേബി ഉദ്​ഘാടനംചെയ്യും.