വർ​ഗീയവാദികളുടെയൊന്നും വോട്ട് എൽഡിഎഫിന് വേണ്ട; കോൺ​ഗ്രസ് നിലപാട് ധ്രുവീകരണം ശക്തിപ്പെടുത്തും: എം വി ​ഗോവിന്ദൻ

തിരുവനന്തപുരം: ജമാഅത്തെ ഇസ്ലാമിയുമായുള്ള യുഡിഎഫിന്റെ ബന്ധം ​ദൂരവ്യാപക പ്രത്യാഘാതമുണ്ടാക്കുമെന്ന് സിപിഐ എം സംസ്ഥാന സെക്രട്ടറി എം വി ​ഗോവിന്ദൻ. ഈ കൂട്ടുകെട്ടിനെക്കുറിച്ച് കോൺ​ഗ്രസിന് മറുപടിയൊന്നും പറയാനില്ല. പ്രിയങ്കാ​ഗാന്ധി എംപിയോടും ഇതേ ചോദ്യം ആവർത്തിച്ചിട്ടും ഒന്നിനും മറുപടി തന്നിട്ടില്ല. രാജ്യത്തിന് അപകടകരമായ നിലപാട് ദൂരവ്യാപക പ്രത്യാഘാതമുണ്ടാക്കും. ഭൂരിപക്ഷ-ന്യൂനപക്ഷ വർ​ഗീയവാദികളെ പരസ്പരം തമ്മിലടിപ്പിച്ച് ധ്രൂവീകരണം ശക്തിപ്പെടുത്താനേ കോൺ​ഗ്രസിന്റെ ഈ നീക്കം ഉപകരിക്കൂവെന്നും എം വി ​ഗോവിന്ദൻ മാധ്യമങ്ങളോട് പറഞ്ഞു.

ഒരു വർ​ഗീയവാദികളുടെയും വോട്ട് എൽഡിഎഫിന് വേണ്ട. വിശ്വാസികളൊന്നും വർ​ഗീയവാദികളല്ല, വർ​ഗീയവാദികൾക്ക് വിശ്വാസവുമില്ല. വിശ്വാസത്തെ ഉപകരണമായി ഉപയോ​ഗിക്കുന്നവരാണ് വർ​ഗീയവാദികൾ.

മലപ്പുറം ജില്ലാരൂപീകരണത്തെ എതിർത്തവരാണ് കോൺ​ഗ്രസ്. കുട്ടിപാകിസ്ഥാൻ എന്നാണ് കോൺ​ഗ്രസ് അന്ന് മലപ്പുറത്തെ വിളിച്ചത് 1967ലെ സർക്കാർ മലപ്പുറം ജില്ലാരൂപീകരിക്കാൻ തീരുമാനിച്ചപ്പോൾ അതിനെ എതിർത്ത് വഴിക്കടവ് നിന്ന് കോഴിക്കോട്ടേക്ക് പ്രകടനം നയിച്ച ആളാണ് ഇന്നത്തെ യുഡിഎഫ് സ്ഥാനാർഥിയുടെ പിതാവ് ആര്യാടൻ മുഹമ്മദ്. അന്നത്തെ ജനസംഘവും കോൺ​ഗ്രസിനൊപ്പം ജില്ലാരൂപീകരണത്തെ എതിർത്തു. കേരളത്തിലെ ജനങ്ങൾക്ക് ഇതെല്ലാം അറിയാം. എന്നിട്ടാണ് ഇല്ലാത്തൊരു പ്രസ്താവനയുടെ പേരിൽ മലപ്പുറം ജില്ലയെ അപമാനിക്കാൻ ശ്രമിക്കുന്നു എന്ന് കള്ളപ്രചരണം നടത്തുന്നതെന്നും എം വി ​ഗോവിന്ദൻ പറഞ്ഞു.