തല അടിച്ചു പൊട്ടിക്കും; പൊലീസിനെതിരെ കൊലവിളിയുമായി കെഎസ്‍യു നേതാവ്

കോഴിക്കോട് : പൊലീസിനെതിരെ കൊലവിളിയുമായി കെഎസ്‍യു നേതാവ്. കോഴിക്കോട് ജില്ലാ പ്രസിഡന്റ് വി ടി സൂരജാണ് ഭീഷണി മുഴക്കിയത്. തല അടിച്ചു പൊളിക്കുമെന്നായിരുന്നു ഭീഷണി. പൊലീസ് ഉദ്യോ​ഗസ്ഥരുടെ പേര് എടുത്തുപറഞ്ഞായിരുന്നു ഭീഷണി. കെഎസ്‍യുവിന്റെ സമരം നടക്കുന്നയിടത്തേക്ക് കടന്നുവന്നാൽ പൊലീസ് ഉദ്യോ​ഗസ്ഥരുടെ തല അടിച്ചു പൊളിക്കുമെന്നാണ് പൊതുവേദിയിൽ വച്ച് കെഎസ്‍യു ജില്ലാ പ്രസിഡന്റ് ഭീഷണി മുഴക്കിയത്.

ഡിസിസി പ്രസിഡൻ്റ് കെ പ്രവീണ്‍ കുമാറിന്റെ നിരാഹാര സമരത്തിനിടെയാണ് ഭീഷണി പ്രസംഗം നടത്തിയത്. മുതിർന്ന കോൺ​ഗ്രസ് നേതാക്കളടക്കം ഇരുന്ന വേദിയിലായിരുന്നു നേതാവിന്റെ കൊലവിളി പ്രസം​ഗം. സമരമുഖത്തേക്ക് കടന്നുവന്നാൽ കെഎസ്‍യുവും യൂത്ത് കോൺ​ഗ്രസും പൊലീസുകാരെ ആക്രമിക്കുമെന്നാണ് വി ടി സൂരജ് പറഞ്ഞത്. മുമ്പും ഉദ്യോ​ഗസ്ഥർക്കെതിരെ സൂരജ് ഭീഷണി മുഴക്കിയിരുന്നു.