നേതൃത്വത്തിനെതിരെ ചേർത്തലയിൽ ബിജെപി ഗ്രൂപ്പ്​ യോഗം

ആലപ്പുഴ

ബിജെപി സംസ്ഥാന നേതൃത്വത്തിനെതിരെ കലാപാഹ്വാനവുമായി ചേർത്തലയിൽ ഗ്രൂപ്പ്​ യോഗം. സംസ്ഥാന വൈസ്​ പ്രസിഡന്റ്​ പി സുധീറിന്റെ നേതൃത്വത്തിൽ 26നായിരുന്നു യോഗം. ബിജെപി ആലപ്പുഴ നോർത്ത്​ ജില്ലാ കമ്മിറ്റി അധ്യക്ഷനും അടുപ്പക്കാരും യോഗത്തിൽ പങ്കെടുത്തു. തദ്ദേശ തെരഞ്ഞെടുപ്പിലും നിയമസഭാ തെരഞ്ഞെടുപ്പിലും വിലപേശി വാങ്ങേണ്ട സ്ഥാനങ്ങളെക്കുറിച്ച്​ യോഗം ചർച്ചചെയ്​തു.

രാജീവ്​ ചന്ദ്രശേഖർ സംസ്ഥാന അധ്യക്ഷനായശേഷം ബിജെപിയിലുണ്ടായ ചേരിതിരിവിന്റെ ഭാഗമാണ്​ ഗ്രൂപ്പ്​ യോഗം. ആലപ്പുഴയിൽ രൂപീകരിച്ച രണ്ട്​ സംഘടനാ ജില്ലകളുടെ ചുമതലകളിൽ​ മുതിർന്ന നേതാക്കളെ തഴഞ്ഞു. ഇത്​ രൂക്ഷമായ എതിർപ്പുണ്ടാക്കി. മുതിർന്ന നേതാക്കൾ പ്രതിഷേധം അറിയിച്ചെങ്കിലും സംസ്ഥാന അധ്യക്ഷൻ തിരിഞ്ഞുനോക്കിയില്ല. തുടർന്നാണ്​ ഗ്രൂപ്പ്​ ശക്തമായത്​. സംഘടനാ തെരഞ്ഞെടുപ്പിലെ തിരിമറിയുടെ വിവരങ്ങൾ ഒരുവിഭാഗം പുറത്തുവിട്ടു. സംഘടനാ നിർദേശത്തിനും ചട്ടത്തിനും വിരുദ്ധമായി ബൂത്ത്​തലംമുതൽ നടന്ന പ്രവർത്തനങ്ങൾ പുറത്തായത്​ നേതൃത്വത്തെ വെട്ടിലാക്കി.

ആലപ്പുഴയിൽ സ‍ൗത്ത്​, നോർത്ത്​ സംഘടനാ ജില്ലകളിലെ അധ്യക്ഷപദവി സാമുദായിക അടിസ്ഥാനത്തിലാണ്​ വിഭജിച്ചതെന്ന ആക്ഷേപവും ശക്തം​. ജില്ലാ കമ്മിറ്റി ഓഫീസ്​ നിർമാണത്തിലെ അഴിമതിയെക്കുറിച്ച്​ ഒരുവിഭാഗം പരാതി നൽകിയെങ്കിലും സംസ്ഥാന നേതൃത്വം കാര്യമാക്കിയിട്ടില്ല.