ഗോവിന്ദച്ചാമിക്കൊപ്പം കഥകളും ജയിൽചാടി

കണ്ണൂർ

സെല്ലിലെ കമ്പി തുരുമ്പെടുപ്പിക്കാൻ ഉപ്പുവച്ചു, കാണാതിരിക്കാൻ തുണി കെട്ടി, അലർജിയാണെന്ന്​ ഡോക്ടറോട്​ പറഞ്ഞ്​ താടിനീട്ടി... ഗോവിന്ദച്ചാമിയുടെ ജയിൽചാടലിൽ പ്രചരിച്ച കഥകളിലേറെയും കെട്ടിച്ചമച്ചത്​. പൊലീസിന്റെ ചോദ്യംചെയ്യലിനുശേഷവും ഇത്തരം കഥകൾ ആധികാരികമായി പ്രചരിപ്പിക്കുകയായിരുന്നു ചില മാധ്യമങ്ങൾ.

വെള്ളിയാഴ്​ച ഗോവിന്ദച്ചാമി ജയിൽചാടിയ വിവരം ലഭിച്ചയുടൻതന്നെ സിറ്റി പൊലീസ്​ കമീഷണറടക്കമുള്ള പൊലീസ്​ ഉദ്യോഗസ്ഥർ ജയിലിലെത്തി. സെല്ലിന്റെ കമ്പി മുറിച്ചതും മതിലിൽ കയറാൻ പ്ലാസ്​റ്റിക്​​ ടാങ്ക്​ ഉൾപ്പെടെയുള്ളവ ഉപയോഗിച്ചതും പരിശോധിച്ചശേഷമാണ്​ മടങ്ങിയത്​. 10.45ഓടെ ഗോവിന്ദച്ചാമി പിടിയിലായി. പൊലീസ്​ ട്രെയിനിങ്​​ സെന്ററിൽ ഇയാളെ ചോദ്യംചെയ്​തു.

ആദ്യം വഴങ്ങാതിരുന്ന ഗോവിന്ദച്ചാമി പിന്നീട്​ ചോദ്യങ്ങൾക്ക്​ കൃത്യമായ മറുപടി നൽകി. സെല്ലിന്റെ കമ്പി അളന്നുമുറിച്ചതുപോലെ ആയിരുന്നെന്ന്​ പരിശോധിച്ച​ പൊലീസ്​ ഉദ്യോഗസ്ഥർ പറഞ്ഞു. മുറിച്ചത്​ കാണാതിരിക്കാൻ കമ്പിയിൽ നൂലുകൾ കെട്ടിത്തൂക്കിയിരുന്നു. ഗ്യാസ്​ കട്ടർപോലുള്ള ഉപകരണങ്ങൾ ഉപയോഗിച്ച്​ മുറിച്ചതുപോലെയായിരുന്നു കാഴ്​ചയിൽ.

സെല്ലിൽനിന്ന്​ പുറത്തുകടന്നശേഷം മുറിച്ച കമ്പി പഴയതുപോലെയാക്കിയിരുന്നു. ഉപ്പുവച്ച്​ തുരുമ്പുപിടിപ്പിച്ചതിന്റെ ലക്ഷണങ്ങളൊന്നും സെല്ലിന്റെ കമ്പിയിൽ ഉണ്ടായിരുന്നില്ലെന്നും പൊലീസ്​ ഉദ്യോഗസ്ഥർ പറഞ്ഞു.