കേസ്‌ ഒതുക്കാൻ കൈക്കൂലി ; ഇഡി ഉദ്യോഗസ്ഥൻ ഓഹരി വാങ്ങിയത്​ അച്ഛന്റെ പേരിൽ

കൊച്ചി

കേസ് ഒതുക്കാൻ കൊല്ലത്തെ കശുവണ്ടി വ്യവസായിയിൽനിന്ന് ഇഡി ഏജന്റുമാർ കൈക്കൂലി വാങ്ങിയ കേസിലെ ഒന്നാംപ്രതി എൻഫോഴ്‌സ്‌മെന്റ്‌ ഡയറക്ടറേറ്റ്‌ അസിസ്റ്റന്റ്‌ ഡയറക്ടർ ശേഖർകുമാർ ഓഹരികൾ കൂടുതലായും വാങ്ങിക്കൂട്ടിയത്​ അച്ഛന്റെയും ഭാര്യയുടെയും പേരിൽ. ശേഖർകുമാറിന്റെ ഡീമാറ്റ്​ അക്ക‍ൗണ്ട്​ പരിശോധിച്ചാണിത്​ കണ്ടെത്തിയത്​. ഭാര്യയുടെയും അച്ഛന്റെയും ഡീമാറ്റ്​ അക്ക‍ൗണ്ടുകളും അന്വേഷകസംഘം പരിശോധിക്കും. തെളിവുകൾ ലഭിക്കുന്ന മുറയ്ക്ക്​ ഇരുവരുടെയും മൊഴി വിജിലൻസ്​ രേഖപ്പെടുത്തും.

ബന്ധുക്കളുടെ പേരിലും ശേഖർകുമാർ ഓഹരി വാങ്ങിക്കൂട്ടി​. മറ്റു​ ബിനാമി പേരുകളിൽ ഓഹരികൾ വാങ്ങിയിട്ടുണ്ടോയെന്ന്​ പരിശോധിച്ചുവരികയാണ്​. ശേഖർകുമാർ വിവിധ കമ്പനികളുടെ നാലുകോടിയോളം രൂപയുടെ ഓഹരികൾ വാങ്ങിയതായി തെളിവ് ലഭിച്ചിരുന്നു. ഇതിന്റെ അടിസ്ഥാനത്തിൽ വീണ്ടും ചോദ്യംചെയ്യാനാണ്​ നീക്കം.

കേസിൽ ശേഖർകുമാറിനെ രണ്ടുതവണയാണ് വിജിലൻസ് ചോദ്യംചെയ്തത്. സർക്കാർ ഉദ്യോഗസ്ഥനായ ഒരാൾ എങ്ങനെയാണ് കോടികളുടെ ഓഹരി ഇടപാടുകൾ നടത്തിയതെന്ന സംശയത്തിലാണ് വിജിലൻസ്.

ഇഡി രജിസ്റ്റർ ചെയ്ത മറ്റ്​ കേസുകളിലും ശേഖർകുമാർ കൈക്കൂലി ഇടപാടുകൾ നടത്തിയിട്ടുണ്ടാകാമെന്നു സംശയിക്കുന്നു.

കശുവണ്ടിവ്യവസായിക്കെതിരെ ഇഡി എടുത്ത കള്ളപ്പണം വെളുപ്പിക്കൽ നിരോധന നിയമപ്രകാരമുള്ള കേസ്‌ ഒതുക്കാൻ കൊച്ചിയിലെ ഏജന്റുമാർ മുഖേന രണ്ടുകോടി രൂപ ആവശ്യപ്പെട്ടെന്ന പരാതിയിലാണ് ശേഖർകുമാറിനെതിരെ വിജിലൻസ് കേസെടുത്തത്.