ലഹരിക്കടത്ത്; ആര്‍എസ്എസ് പ്രവര്‍ത്തകന്‍ ഉള്‍പ്പെടെ 3 പേര്‍ അറസ്റ്റില്‍

കട്ടപ്പന : കട്ടപ്പനയിൽ എംഡിഎംഎ പിടികൂടിയ സംഭവത്തിന്റെ തുടരന്വേഷണത്തിൽ രാസലഹരിക്കടത്ത് സംഘത്തിലെ പ്രധാനിയായ ആർഎസ്എസ്–ബിജെപി പ്രവർത്തകൻ ഉൾപ്പെടെ മൂന്നുപേരെ ബംഗളൂരുവിൽനിന്ന് അറസ്റ്റ് ചെയ്തു. കൊലക്കേസ്​ പ്രതിയായ ആർഎസ്എസ് പ്രവർത്തകൻ കണ്ണൂർ പുത്തൂർ കെസി മുക്ക് മീത്തലെപ്പറമ്പത്ത് അരുൺ ഭാസ്‌കർ(30), ഇയാളുടെ സംഘത്തിൽപ്പെട്ട കോഴിക്കോട് കൊയിലാണ്ടി തുയ്യാടൻകണ്ടി ജോജിറാം ജയറാം(35), കർണാടക സ്വദേശി ഭീമപ്പ എസ് ഹൊസമാനി(52) എന്നിവരെയാണ് കട്ടപ്പന പൊലീസ് അറസ്റ്റുചെയ്തത്.

ജൂലൈ 15ന് ബംഗളൂരുവിൽനിന്ന് വിൽപ്പനയ്​ക്ക്​ കട്ടപ്പനയിലെത്തിച്ച 27 ഗ്രാം എംഡിഎംഎയുമായി കോഴിക്കോട് കൊയിലാണ്ടി ഷാലീന ഹൗസ് ഫാരിസ് മുഹമ്മദിനെ(31) അറസ്റ്റ് ചെയ്​തിരുന്നു. ഇയാളിൽനിന്നാണ് അരുൺ ഭാസ്‌കർ ഉൾപ്പെട്ട സംഘത്തെക്കുറിച്ച് വിവരം ലഭിച്ചത്. കണ്ണൂരിൽ സിപിഐ എം പള്ളൂർ മുൻ ലോക്കൽ സെക്രട്ടറി കണ്ണിപ്പൊയിൽ ബാബുവിനെ കൊല്ലാൻ ശ്രമിച്ച കേസിലെ പ്രതിയാണ് അരുൺ.