എം കെ സാനുവിന് അന്ത്യോപചാരമർപ്പിച്ച് മുഖ്യമന്ത്രി പിണറായി വിജയൻ

‌കൊച്ചി: എഴുത്തുകാരനും അധ്യാപകനുമായിരുന്ന പ്രൊഫ. എം കെ സാനുവിന്റെ പൊതുദർശനം എറണാകുളം ടൗൺഹാളിൽ പുരോ​ഗമിക്കുന്നു. മലയാളിയുടെ രാഷ്‌ട്രീയ സാംസ്‌കാരിക ജീവിതത്തിന്‌ ദിശാബോധം പകർന്ന സൗമ്യസാന്നിധ്യമായിരുന്ന സാനുമാഷിന് മുഖ്യമന്ത്രി പിണറായി വിജയൻ അന്ത്യോപചാരമർപ്പിച്ചു. സിപിഐ എം ജനറൽ സെക്രട്ടറി എം വി ​ഗോവിന്ദൻ ഒപ്പമുണ്ടായിരുന്നു. മന്ത്രിമാരായ എം ബി രാജേഷ്, കെ രാജൻ, പി രാജീവ്, വി എൻ വാസവൻ എന്നിവരും എം കെ സാനുവിന് അന്ത്യോപചാരം അർപ്പിക്കാനെത്തിയിരുന്നു.

മൃതദേഹം ​ഞായർ രാവിലെ ഒമ്പതിന്​​ കാരിക്കാമുറി ക്രോസ്റോഡിലെ വസതിയായ ‘സന്ധ്യ’യിൽ കൊണ്ടുവന്നു. തുടർന്ന് പത്തുമുതൽ​ എറണാകുളം ട‍ൗൺഹാളിൽ പൊതുദർശനം ആരംഭിച്ചു. വൈകിട്ട്‌ നാലിന്​ രവിപുരം ശ്​മശാനത്തിൽ സംസ്കരം നടക്കും. അഞ്ചിന് ടൗൺഹാളിൽ അനുശോചനയോഗം ചേരും. ശനിയാഴ്ച വൈകിട്ട്‌ 5.35ന്​ ഇടപ്പള്ളി അമൃത ആശുപത്രിയിലായിരുന്നു അന്ത്യം. വീണ്‌ ഇടുപ്പെല്ല്‌ പൊട്ടിയതിനെതുടർന്ന്‌ 25നാണ്​ ആശുപത്രിയിൽ പ്രവേശിപ്പിച്ചത്​. അടിയന്തര ശസ്‌ത്രക്രിയക്കു​ശേഷം ശ്വാസതടസ്സവും ന്യുമോണിയയും ആരോഗ്യസ്ഥിതി മോശമാക്കി. തീവ്രപരിചരണവിഭാഗത്തിൽ ചികിത്സയിലിരിക്കെ ഹൃദയാഘാതത്തെ തുടർന്നാണ്‌​ മരണം.