കോൺ​ഗ്രസിന്റെ കൈപ്പത്തിയിലുള്ളത് ആർഎസ്എസുമായി ചേർത്തുപിടിച്ചതിന്റെ തഴമ്പ്: ബിനോയ് വിശ്വം

തിരുവനന്തപുരം: ഇടതുപക്ഷം എതിരാളിയാകുന്നിടത്ത് ആരുമായും കോൺ​ഗ്രസ് കൂട്ടുകൂടാറുണ്ടെന്ന് സിപിഐ സംസ്ഥാന സെക്രട്ടറി ബിനോയ് വിശ്വം. കോൺ​ഗ്രസിന്റെ കൈപ്പത്തിയിലുള്ളത് ആർഎസ്എസുമായി ചേർത്തുപിടിച്ചതിന്റെ തഴമ്പാണ്. ആ കൈപ്പത്തി മറച്ചുപിടിക്കാൻ കോൺ​ഗ്രസ് ഇപ്പോൾ പാടുപെടുകയാണ്. കോൺ​ഗ്രസിന്റെ ഈ പോക്കിൽ ആ പാർടിയിലെ ​ഗാന്ധി, നെഹ്റു മൂല്യബോധമുള്ളവർക്ക് അമർഷമുണ്ട്. അവരുടെയുൾപ്പെടെ വോട്ട് നിലമ്പൂരിൽ എൽഡിഎഫിനായിരിക്കുമെന്നും ബിനോയ് വിശ്വം പറഞ്ഞു.

നിലമ്പൂരിലെ ട്രെൻഡ് എൽഡിഎഫിന് അനുകൂലമാണ്. എൽഡിഎഫിന്റെ വോട്ടുകളെല്ലാം പോൾചെയ്യും. തെരഞ്ഞെടുപ്പിൽ എൽഡിഎഫ് സ്ഥാനാർഥി എം സ്വരാജ് ഉറപ്പായും ജയിക്കുമെന്നും അദ്ദേഹം പറഞ്ഞു.

എല്ലാ തെരഞ്ഞെടുപ്പുകളിലും ബിജെപി- കോൺ​ഗ്രസ് കൂട്ടുകെട്ടുണ്ടാകാറുണ്ട്. ഇത്തവണ ആർഎസ്എസിനെും മുസ്ലീം ആർഎസ്എസായ ജമാഅത്തെ ഇസ്ലാമിയുമായും സഖ്യത്തിലാണ് കോൺ​ഗ്രസ്. ​അന്ധമായ ഇടതുപക്ഷ വിരോധമാണ് അതിന്റെ അടിത്തറ. വടകര, ബേപ്പൂർ മോഡൽ കേരളം കണ്ടതാണ്. അന്ന് പരസ്യമായാണ് പൊതുസ്ഥാനാർഥിക്കുവേണ്ടി ബിജെപിയും കോൺ​ഗ്രസും മുസ്ലീം ലീ​ഗും വോട്ട് പിടിച്ചത്. ജനങ്ങൾക്ക് ഇക്കാര്യങ്ങളെല്ലാം ബോധ്യമുള്ളതാണെന്നും ബിനോയ് വിശ്വം മാധ്യമങ്ങളോട് പറഞ്ഞു.