ഏഷ്യാകപ്പ്​ ബാസ്​കറ്റ്​ബോൾ ; ഇന്ത്യക്ക്​ 
വീണ്ടും തോൽവി

ജിദ്ദ

ഏഷ്യാകപ്പ്​ പുരുഷ ബാസ്​കറ്റ്​ബോൾ ചാമ്പ്യൻഷിപ്പിൽ ഇന്ത്യക്ക്​ തുടർച്ചയായി രണ്ടാം തോൽവി. ചൈന 100–69ന്​ ജയിച്ചു. ജോർദാനെതിരെ പൊരുതിത്തോറ്റ ഇന്ത്യക്ക്​ ശക്തരായ ചൈനക്കെതിരെ ചെറുത്തുനിൽപ്പ്​ സാധ്യമായില്ല. ഇതോടെ ക്വാർട്ടർ സാധ്യതക്ക്​ മങ്ങലേറ്റു. അവസാന മത്സരത്തിൽ നാളെ ആതിഥേയരായ സ‍ൗദി അറേബ്യയെ നേരിടും.

കളിയുടെ പൂർണ നിയന്ത്രണം ചൈനക്കായിരുന്നു. ഏഷ്യൻ റാങ്കിങ്ങിൽ പതിനഞ്ചാമതാണ്​ ഇന്ത്യ. ചൈനയാകട്ടെ ആറാംസ്ഥാനത്തും. തുടക്കത്തിൽ 29–14ന്​ മുന്നിൽക്കയറിയ ചൈനയെ പിടിച്ചുകെട്ടാൻ വൈകി. ഇടവേളയിൽ 53–31ന്​ ലീഡ്​ ഉയർത്തി. പിന്നീട്​ ഇന്ത്യ ഉണർന്നുകളിച്ചെങ്കിലും വിജയിക്കാനുള്ള കരുത്തില്ലായിരുന്നു. 17 പോയിന്റ്​​ വീതം നേടിയ മിങ്​സുവാൻ ഹുവും ജിയായി സാവോയും വിജയത്തിൽ നിർണായക പങ്കുവഹിച്ചു. ഇന്ത്യൻ നിരയിൽ അരവിന്ദ്​ മുത്തുകൃഷ്​ണനും മലയാളിയായ പ്രണവ്​ പ്രിൻസും തിളങ്ങി.​ അരവിന്ദ്​ 16 പോയിന്റ്​​ നേടി. പ്രണവിന്​ 14 പോയിന്റുണ്ട്​. മറ്റൊരു മലയാളി വൈശാഖ്​ കെ മനോജ്​ കളിക്കാനിറങ്ങിയില്ല.

ഗ്രൂപ്പ്​ സിയിൽ ചൈന നാല്​ പോയിന്റുമായി മുന്നിലാണ്​. ​ ഇന്ത്യക്കും ജോർദാനും രണ്ട്​ പോയിന്റുണ്ട്​. സ‍ൗദിക്ക്​ ഒരു പോയിന്റ്​​. ഗ്രൂപ്പ്​ ജേതാക്കൾ നേരിട്ട്​ ക്വാർട്ടറിലെത്തും. രണ്ടും മൂന്നും സ്ഥാനക്കാർക്ക്​ പ്ലേഓഫ്​ കളിക്കാൻ അവസരമുണ്ട്​.