ഏഷ്യാകപ്പ്‌ ബാസ്‌കറ്റ്‌ബോൾ ; ഇന്ത്യ 
സെമിക്കരികെ

ബീജിങ്

ഫിബ വനിതാ ഏഷ്യാ കപ്പ്‌ ബാസ്‌കറ്റ്‌ബോളിൽ ജയത്തോടെ ഇന്ത്യ സെമിക്കരികെയെത്തി. തഹിതിയെ 78–-55ന്‌ കീഴടക്കി. മലയാളിയായ ആർ ശ്രീകല തിളങ്ങി. കെഎസ്‌ഇബി താരം 15 പോയിന്റ്‌ നേടി. അനീഷ ക്ലീറ്റസ്, സൂസൻ ഫ്ലോറന്റീന എന്നിവർ ടീമിലെ മറ്റ്‌ മലയാളികളാണ്‌.

ആദ്യകളിയിൽ കസാഖ്‌സ്ഥാനെ 85–-68ന്‌ തോൽപ്പിച്ച ഇന്ത്യ ചൈനീസ്‌ തായ്‌പേയിയോട്‌ തകർന്നിരുന്നു(39–-83). നിർണായകമത്സരത്തിൽ ശ്രീകലയുടെ പോയിന്റിലൂടെയാണ്‌ ഇന്ത്യ മുന്നിലെത്തിയത്‌. ഒരുവേള 13–-15ന്‌ തഹിതി കയറിവന്നു. എന്നാൽ ഓൾറൗണ്ട്‌ മികവിലൂടെ ഇന്ത്യ 25–-13ലേക്ക്‌ കുതിച്ചു. ഇടവേളയിൽ സ്‌കോർ 46–-25 ആയിരുന്നു. തുടർന്ന്‌ 61–-40ലേക്കും ഏകപക്ഷീയമായ വിജയത്തിലേക്കും മുന്നേറി.

ഇന്ത്യ ഏഷ്യാകപ്പ്‌ ബി ഡിവിഷനിലാണ്‌. അതിൽ നാല്‌ ടീമുകൾ ഉള്ള എ ഗ്രൂപ്പിൽ. ബി ഗ്രൂപ്പിലെ മൂന്നാംസ്ഥാനക്കാരായ തായ്ലൻഡിനെതിരെയാണ്‌ സെമിഫൈനൽ യോഗ്യതാമത്സരം.

എ ഡിവിഷനിൽ ചൈനയും ദക്ഷിണകൊറിയയും അടക്കം എട്ട്‌ ടീമുകളുണ്ട്‌. ബി ഡിവിഷൻ ജേതാക്കൾക്ക്‌ അടുത്തവർഷം എ ഡിവിഷനിൽ കളിക്കാം. നാല്‌ വർഷത്തെ ഇടവേളക്കുശേഷമാണ്‌ ഇന്ത്യ ഏഷ്യാകപ്പിൽ കളിക്കുന്നത്‌.