ഏഷ്യാ കപ്പ്​ ബാസ്​കറ്റ്​ബോൾ ; ജോർദാന് മുന്നിൽ ഇന്ത്യ പൊരുതി വീണു

ജിദ്ദ

ഫിബ ഏഷ്യാ കപ്പ്​ ബാസ്​കറ്റ്​ബോൾ ചാമ്പ്യൻഷിപ്പിൽ ഇന്ത്യൻ പുരുഷ ടീം ആദ്യ മത്സരത്തിൽ പൊരുതിത്തോറ്റു. റാങ്കിങ്ങിൽ മുന്നിലുള്ള ജോർദാൻ 91–84ന്​ ജയിച്ചു. ഇന്ത്യൻ ടീമിന്റെ ഏഷ്യൻ റാങ്ക് 15 ആണ്. ജോർദാന്​ എട്ടാം റാങ്ക്​​. നിശ്​ചിതസമയത്ത്​ സ്​കോർ 80–80 ആയിരുന്നു. അധികസമയത്താണ്​ ജോർദാന്റെ ജയം.

ശക്തരായ എതിരാളികളെ ഇടവേളയിൽ 38–38ന്​ പിടിച്ചുകെട്ടി. അരവിന്ദ്​​ മുത്തുകൃഷ്​ണനും (14) മലയാളിയായ പ്രണവ്​ പ്രിൻസും (12) ഹർഷ്​ ദാഗറുമാണ്​ (12) ഇന്ത്യൻ നിരയിൽ തിളങ്ങിയത്​. തുടക്കത്തിൽ ​ 18–14 ലീഡ്​ പിടിച്ച ജോർദാനെ മികച്ച നീക്കങ്ങളിലൂടെ തളച്ചിടാനായി. ഓരോ പോയിന്റിനുംവേണ്ടി പൊരുതിക്കളിക്കുന്ന കളിക്കാരെയാണ്​ കണ്ടത്​. ജോർദാൻ നിരയിലെ ഡാർ ടക്കറുടെ മാസ്​മരിക പ്രകടനം ഇന്ത്യയെ തളർത്തി. നിർണായക ഘട്ടങ്ങളിലെല്ലാം ഇ‍ൗ അമേരിക്കൻ വംശജൻ ബാസ്​കറ്റ്​ നിറച്ചു. നിർണായകമായ 30 പോയിന്റാണ്​ സമ്പാദ്യം.

കളി തീരാൻ മൂന്ന്​ മിനിറ്റുള്ളപ്പോൾ ജോർദാൻ 76–74ന്​ മുന്നിൽ കയറി. പ്രിൻസ്​പാൽ സിങ്ങിലൂടെ ഇന്ത്യ ഒപ്പമെത്തി. വീണ്ടും 78ലേക്ക്​ കുതിച്ച ഇന്ത്യയെ ജോർദാൻ അവസാന സെക്കൻഡിൽ തളച്ചു. അവസാന നിമിഷത്തിൽ ഇന്ത്യ നടത്തിയത്​ ജീവൻമരണ പോരാട്ടമായിരുന്നു. ​ എന്നാൽ ആ മികവ്​ അധികസമയത്ത്​ തുടരാനായില്ല. മലയാളിയായ വൈശാഖ്​ കെ മനോജും കളത്തിൽ ഇറങ്ങി.

അമേരിക്കക്കാരനായ സ്​കോട്ട് ഫ്ലെമിങ് പരിശീലിപ്പിക്കുന്ന ടീം നാളെ ചൈനയെ നേരിടും. ​ ശനിയാഴ്​ച അവസാന മത്സരം സ‍ൗദി അറേബ്യയുമായാണ്​.