അണ്ടർ-20 ലോകകപ്പ്: ബ്രസീൽ പുറത്തായി, അർജന്റീന മുന്നേറുന്നു

റാങ്കാഗ്വ: ഫിഫ അണ്ടർ 20 ലോകകപ്പിൽ ഒരു ജയം പോലുമില്ലാതെ ബ്രിസീൽ നാണം കെട്ട് പുറത്ത്. ​ഗ്രൂപ്പ് മത്സരത്തിൽ സ്പെയ്നിനോട് ഒരു ​ഗോളിന് തോറ്റാണ് ബ്രസീൽ കൗമാരം പുറത്തായത്. അഞ്ചു തവണ ചാമ്പ്യന്മാരായ ബ്രസീൽ ആദ്യമായാണ് ​ഗ്രൂപ്പ് ഘട്ടം കടക്കാതെ പുറത്താകുന്നത്. ​ഗ്രൂപ്പ് സിയിൽ ഒരു സമനിലയും രണ്ട് പരാജയവുമായവും ഏറ്റുവാങ്ങി ഒരുപോയന്റോടെ അവസാന സ്ഥാനമാണ് ബ്രസീലിന് ലഭിച്ചത്.

ഇക്കർ ​​ബ്രാവോ നേടിയ ഗോളിലാണ് സ്പെയ്ന്‍ ബ്രസീലിനെ വീഴഅത്തിയത്. കളിയുടെ രണ്ടാം പകുതിയിൽ 47-ാം മിനിറ്റിലാണ് ​​ബ്രാവോ ടീമിനായി ​ഗോൾ നേടിയത്. മത്സരത്തിൽ മികച്ച തുടക്കം ബ്രസീലിന് ലഭിച്ചെങ്കിലും അത് ഫലപ്രദമായി ഉപയോഗപ്പെടുത്താൻ ടീമിനായില്ല. ഒരു ഗോൾ നേടിയിരുന്നെങ്കിലും ഓഫ്‌സൈഡായി. ഗ്രൂപ്പ് സിയിൽ നിന്ന് മെക്സിക്കോയും മൊറോക്കോയും നോക്കൗട്ടിലേക്ക് കടന്നു.

photo: AFP

​ഗ്രൂപ്പ് ഡിയിൽ ഇറ്റലിയെ പരാജയപ്പെടുത്തി അർജന്റീനയും നോക്കൗട്ടിലേക്ക് കടന്നു. തോൽവി അറിയാതെയാണ് അർജന്റീനൻ മുന്നേറ്റം. മത്സരത്തില്‍ മറുപടിയില്ലാത്ത ഒരു ​ഗോളിനാണ് ടീം ഇറ്റലിയെ വീഴ്ത്തിയത്. 74-ാം മിനിറ്റിൽ ഡിലൻ ഗൊറോസിറ്റോ നേടിയ ഗോളാണ് ടീമിന് വിജയം സമ്മാനിച്ചത്. തോൽവി വഴങ്ങിയെങ്കിലും ​ഗ്രൂപ്പിൽ രണ്ടാം സ്ഥാനക്കാരായി ഇറ്റലിയും നോക്കൗട്ടിലേക്ക് മുന്നേറി. മറ്റൊരു കളിയിൽ ഓസ്ട്രേലിയ ഒന്നിനെതിരെ മൂന്ന് ​ഗോളുകൾക്ക് ക്യൂബയെ പരാജയപ്പെടുത്തി. മെക്സിക്കോ മറുപടിയില്ലാത്ത ഒരു ​ഗോളിന് മൊറോക്കോയെയും വീഴ്ത്തി.