കിക്കെടുക്കാനെത്തിയപ്പോൾ കൂകിവിളി, ശബ്ദം പോരെന്ന് നെയ്മർ; പിന്നാലെ കോർണർ കിക്ക് വലയിലാക്കി മറുപടി

സാവോ പോളോ : കൂകി വിളിച്ച എതിർ ടീമിന്റെ ആരാധകർക്ക് ​ഗോളിലൂടെ മറുപടി നൽകി ബ്രസീലിയൻ താരം നെയ്മർ. നിലവിൽ സാന്റോസിൽ കളിക്കുന്ന താരം ഒളിമ്പിക് ​ഗോളിലൂടെയാണ് ഹേറ്റേഴ്സിന് മറുപടി നൽകിയത്. പോളിസ്റ്റ എ വൺ ലീഗ് മത്സരത്തിൽ ഇന്റർനാഷണൽ ഡെ ലിമെയ്റയ്ക്കെതിരെയായിരുന്നു നെയ്മറിന്റെ സൂപ്പർ ​ഗോൾ.

മത്സരത്തിന്റെ 27ാം മിനിറ്റിലാണ് നെയ്മർ ​ഗോൾ നേടിയത്. കോർണർ കിക്കെടുക്കാനായി നെയ്മർ എത്തിയപ്പോൾ ലിമെയ്റ ആരാധകർ കൂക്കി വിളിക്കുകയായിരുന്നു. എന്നാൽ ശബ്ദം പോരെന്ന് മറുപടി നൽകിയ നെയ്മർ തൊട്ടടുത്ത നിമിഷം കോർണർ കിക്ക് വലയിലാക്കി.

സംഭവത്തിന്റെ വീഡിയോ സോഷ്യൽ മീഡിയയിൽ പ്രചരിച്ചു. ​ഗോളിന് ശേഷം സാന്റോസ് ആരാധകർ ആഹ്ലാദം പ്രകടിപ്പിക്കുന്നതും ലിമെയ്റ ആരാധകർ ഞെട്ടി നിൽക്കുന്നതകും വീഡിയോയിൽ കാണാം. മത്സരത്തിൽ സാന്റോസ് എതിരില്ലാത്ത മൂന്ന് ​ഗോളിന് ജയിച്ചു. സാന്റോസിനായുള്ള നെയ്മറിന്റെ രണ്ടാമ ​ഗോളാണിത്. ബാഴ്സയിലെത്തുന്നതിനു മുമ്പ് സാന്റോസിന്റെ താരമായിരുന്നു നെയ്മർ. സൗദി ക്ലബ്ബായ അൽ ഹിലാലിൽ നിന്നാണ് തിരിച്ച് സാന്റോസിലെത്തിയത്.