ഫിഫ ക്ലബ് ലോകകപ്പ്: മെസി ​ഗോളിൽ മയാമി, അത്‌ലറ്റികോയ്ക്കും ജയം

അറ്റ്‌ലാൻ്റ: ഫിഫ ക്ലബ് ഫുട്‌ബോൾ ലോകകപ്പിൽ സൂപ്പർതാരം ക്ലബ്‌ ലയണൽ മെസി ​ഗോളിൽ ഇന്റർ മയാമിയ്ക്ക് ജയം. പോർച്ചുഗൽ ക്ലബ് പോർട്ടോയെ ഒന്നിനെതിരെ രണ്ടു ​ഗോളുകൾക്കാണ് മയാമി വീഴ്ത്തിയത്. ഒരു ​ഗോളിന് പിന്നിട്ടു നിന്ന ശേഷമായിരുന്നു ടീമിന്റെ തിരിച്ചുവരവ്.

കളുടെ തുടക്കത്തിൽ തന്നെ പോർട്ടോ ​ഗോൾ നേടി. എട്ടാം മിനിറ്റിൽ ടീമിന് അനുകൂലമായി ലഭിച്ച പെനാൽറ്റി സാമു അഗെഹോവ വലയിലെത്തിക്കുകയായിരുന്നു. ​ഗോൾ തിരിച്ചടിക്കാനായി മയാമി ശ്രമം നടത്തിയെങ്കിലും ആദ്യപകുതിയിൽ പോർട്ടോയ്ക്കായിരുന്നു മേൽക്കൈ. എന്നാൽ രണ്ടാം പകുതിയുടെ തുടക്കത്തിൽ തന്നെ രണ്ട് ​ഗോളടിച്ച് മയാമി കളിയിലേക്ക് തിരിച്ചെത്തുകയായിരുന്നു. 47-ാം മിനിറ്റിൽ ടെലാസ്കോ സെഗോവിയ മയാമിക്കായി സമനില നേടി. ഏഴ് മിനിറ്റിനുള്ളിൽ മനോഹരമായ ഫ്രീകിക്കിലൂടെ മെസി ടീമിന്റെ വിജയ​ഗോൾ കണ്ടെത്തി. പോസ്റ്റിന് പുറത്ത് ലഭിച്ച കിക്ക് മെസി അനായാസം വലയിലെത്തിക്കുകയായിരുന്നു.

മയാമിക്കായി മെസിയുടെ ​ഗോൾ നേട്ടം 50 ആയി. മയാമിക്കായി ഈ നേട്ടം കൈവരിക്കുന്ന ആദ്യ താരമെന്ന റെക്കോഡും മെസി സ്വന്തമാക്കി. 61 മത്സരങ്ങളിൽ നിന്നാണ് മെസി ടീമിനായി വേണ്ടി 50 ഗോളുകൾ നേടിയത്.

ഇതോടെ ​ഗ്രൂപ്പ് എ യിൽ നാല് പോയന്റുമായി മയാമി രണ്ടാമതായി. നാലു പോയന്റുള്ള ബ്രസീലിയൻ ക്ലബ് പൽമിറാസ്‌ ആണ് ഒന്നാമത്. ക്ലബ് ലോകകപ്പിലെ ആദ്യ മത്സരത്തിൽ ഈജിപ്‌ത്യൻ ക്ലബ്‌ അൽ അഹ്‌ലിനോട് മയാമിയെ ഗോളടിക്കാതെ സമനിലയിൽ പിരിയുകയായിരുന്നു.

​ഗ്രൂപ്പ് ബിയിൽ നടന്ന മത്സരത്തിൽ അത്‌ലറ്റികോ മാഡ്രിഡ്‌ അമേരിക്കൻ ​ക്ലബ് സ്‌റ്റീൽ സൗണ്ടേഴ്‌സിനെ തകർത്തു. ഒന്നിനെതിരെ മൂന്നു ​ഗോളുകൾക്കായിരുന്നു ജയം. ആദ്യ കളയിൽ പിഎസ്ജിയോടെ നാല്‌ ഗോളിന്‌ തരിപ്പണമായ അത്‌ലറ്റികോ തുടക്കം മുതൽ ആക്രമിച്ചാണ് ഇത്തവണ കളിച്ചത്. 22കാരൻ പാബ്ലോ ബാരിയോസോ ടീമിനായി രണ്ടു ​ഗോളുകൾ നേടി.

കളിയുടെ 11-ാം മിനിറ്റിൽ തന്നെ യുവതാരം അത്‌ലറ്റികോ മാഡ്രിഡിനായി ​ഗോൾ കണ്ടെത്തി. രണ്ടാം പകുതിയുടെ തുടക്കത്തിൽ 47-ാം മിനിറ്റിൽ ആക്സൽ വിറ്റ്സൽ അത്‍ലറ്റികോയുടെ ലീഡ് ഉയർത്തി. 55-ാം മിനിറ്റിൽ പാബ്ലോ ബാരിയോസോ ടീമിനായി തന്റെ രണ്ടാം ​ഗോളും നേടി. 50-ാം മിനിറ്റിൽ ആൽബർട്ട് റുസ്‌നാക്ക് സ്‌റ്റീൽ സൗണ്ടേഴ്‌സിനായി ആശ്വാസ ​ഗോൾ നേടി.