ഇന്ത്യൻ പാഠം ; വലിയ പ്രതീക്ഷയോടെ 
നിയമനം

ന്യൂഡൽഹി

ഇന്ത്യൻ ഫുട്​ബോളിന്റെ മർമം അറിയുന്ന പരിശീലകനാണ്​ ഖാലിദ്​ ജമീൽ. കളിക്കാരനായും കോച്ചായും 28 വർഷമായി രംഗത്തുണ്ട്​. തോൽവിയുടെ പടുകുഴിയിൽ വീണുകിടക്കുന്ന ടീമിനെ രക്ഷിക്കാൻ അഖിലേന്ത്യാ ഫുട്‌ബോൾ ഫെഡറേഷൻ (എഐഎഫ്‌എഫ്‌) നാൽപ്പത്തെട്ടുകാരനെ ചുമതലപ്പെടുത്തിയത്​ യാദൃശ്ചികമല്ല.

പതിമൂന്ന് വർഷത്തിനുശേഷമാണ്​ ദേശീയടീമിന്​ ഇന്ത്യൻ പരിശീലകൻ എത്തുന്നത്​. 2011–-12 സീസണിൽ സാവിയോ മെദയ്‌റെയായിരുന്നു അവസാന ഇന്ത്യക്കാരൻ. പിന്നീട്​ വന്നതെല്ലാം വിദേശ കോച്ചുമാർ.

ഐ എം വിജയന്റെ നേതൃത്വത്തിലുള്ള ടെക്‌നിക്കൽ കമ്മിറ്റിയാണ്​ പുതിയ പരിശീലകനെ ശുപാർശചെയ്‌തത്‌. ഡെപ്യൂട്ടി ചെയർപേഴ്‌സൺ ഷബീറലി, അംഗമായ ക്ലൈമാക്‌സ്‌ ലോറൻസ്‌, ടെക്നിക്കൽ ഡയറക്ടർ സയ്​ദ്​ ഷബീർ പാഷ അടക്കമുള്ളവർ ഇന്ത്യക്കാരനെ നിയമിക്കണമെന്ന നിലപാടായിരുന്നു. ഇത്​ ഫെഡറേഷൻ അംഗീകരിച്ചു.

കളത്തിലും പുറത്തും പ്രതിസന്ധി നേരിടുന്ന എഐഎഫ്‌എഫ് വിദേശ കോച്ചിനെ എത്തിച്ചാലുള്ള വലിയ സാമ്പത്തിക ബാധ്യതയും ഇതിലൂടെ ഒഴിവാക്കി. ഒപ്പം നിലവിലെ സാഹചര്യത്തിൽ പരിചയസമ്പന്നനായ നാട്ടുകാരനാകും ഉചിതമെന്ന പൊതുഅഭിപ്രായവും ഉയർന്നു. അന്തിമപട്ടികയിൽ ഖാലിദിനെകൂടാതെ സ്റ്റീഫൻ കോൺസ്റ്റന്റൈൻ (ബ്രിട്ടൻ), സ്‌റ്റെഫാൻ തർകോവിച്ച്​ (സ്ലൊവാക്യ) എന്നിവരുമുണ്ടായി​. ആകെ 170 അപേക്ഷകൾ വന്നു.

സ്​പാനിഷുകാരൻ മനോലോ മാർക്വസ്‌ പടിയിറങ്ങിയതോടെയാണ്‌ ഇന്ത്യ പുതിയ കോച്ചിനെ തേടിയത്‌. എട്ട്‌ കളിയിൽ ഒറ്റ ജയംമാത്രമാണ്‌ മനോലോയ്​ക്കുകീഴിൽ. ഫിഫ റാങ്കിങ്ങിൽ 133–-ാം സ്ഥാനത്തേക്ക്‌ വീണു.

കുവൈത്തിൽ ജനിച്ച ഖാലിദിന്റെ രക്ഷിതാക്കൾ പഞ്ചാബിൽനിന്നാണ്. ക‍ൗമാരകാലത്ത്​ ഇന്ത്യയിലെത്തി. 1997ൽ മഹീന്ദ്ര യുണൈറ്റഡിലൂടെ കളി തുടങ്ങിയ മധ്യനിരക്കാരൻ എയർ ഇന്ത്യ, മുംബൈ എഫ്​സി ക്ലബ്ബുകൾക്കായും കുപ്പായമിട്ടു. ഇന്ത്യക്കായി 12 തവണയിറങ്ങി. 2009മുതൽ പരിശീലകനാണ്​. എഎഫ്​സി പ്രോ ലൈസൻസ്​ ഉടമ ഇതുവരെ ഏഴ് ക്ലബ്ബുകളുടെ ചുമതലവഹിച്ചു.

ഐ ലീഗിൽ 2017ൽ ഐസ്വാൾ എഫ്‌സിയെ ചാമ്പ്യൻമാരാക്കി ശ്രദ്ധിക്കപ്പെട്ടു. ശരാശരി ടീമിനെ മികച്ച സംഘമാക്കി മാറ്റാൻ മിടുക്കുണ്ട്​. പുതിയ താരങ്ങളെ കണ്ടെത്തി വളർത്തുന്നതിൽ നിർണായക ഇടപെടൽ നടത്താറുണ്ട്.

നോർത്ത്​ ഇ‍ൗസ്റ്റ്​ യുണൈറ്റഡിന്റെ ചുമതലയേറ്റതോടെ ഐഎസ്​എല്ലിലെ ആദ്യ ഇന്ത്യൻ കോച്ചായി മാറി. രണ്ട്​ വർഷമായി ജംഷഡ്പുർ എഫ്​സിയിലുണ്ട്​. ഈ രണ്ട് ക്ലബുകളെയും ലീഗിന്റെ പ്ലേ ഓഫിൽ എത്തിച്ച് ചരിത്രമിട്ടു. രണ്ടുവട്ടം രാജ്യത്തെ മികച്ച പരിശീലകനുള്ള പുരസ്കാരം നേടിയിട്ടുണ്ട്.

ഖാലിദ് ജമീൽ

വയസ്സ്: 48

കളിജീവിതം: 1997–2009

മധ്യനിരക്കാരൻ

ക്ലബുകൾ:

മഹീന്ദ്ര യുണെെറ്റഡ്

എയർ ഇന്ത്യ 
മുംബെെ എഫ്സി.

ഇന്ത്യ: 12 മത്സരങ്ങൾ 
(1998–2001).

പരിശീലകൻ

2009–15: മുംബെെ എഫ്സി

2016–17: ഐസ്വാൾ എഫ്സി

2017–18: ഈസ്റ്റ് ബംഗാൾ

2019: മോഹൻ ബഗാൻ

2019–22: നോർത്ത് ഈസ്റ്റ് യുണെെറ്റഡ്

2023: 
ബംഗളൂരു യുണെെറ്റഡ്

2023 മുതൽ ജംഷഡ്പുർ എഫ്സി.

നേട്ടങ്ങൾ

ഐസ്വാൾ എഫ്സിയെ ഐ ലീഗ് ചാമ്പ്യൻമാരാക്കി

ഐഎസ്എൽ മുഖ്യ പരിശീലകനാകുന്ന ആദ്യ ഇന്ത്യക്കാരൻ. നോർത്ത് ഈസ്റ്റ് യുണെെറ്റഡിനെയും ജംഷഡ്പുർ എഫ്സിയെയും സെമിയിൽ എത്തിച്ചു.

പ്രകടനം നന്നായാൽ തുടരാം

ഖാലിദ്​ ജമീലുമായുള്ള കരാർ വ്യവസ്ഥകൾ അഖിലേന്ത്യാ ഫുട്​ബോൾ ഫെഡറേഷൻ വെളിപ്പെടുത്തിയിട്ടില്ല. കാലാവധിയോ മറ്റ്​ നിബന്ധനകളോ ഒന്നുമറിയില്ല. സൂചനകൾ അനുസരിച്ച്​ ഒരുവർഷ കരാറാണ്​ നൽകിയിരിക്കുന്നതെന്നാണ്​ വിവരം. പ്രകടനം നന്നായാൽ തുടരാം എന്നാണ്​ ഉപാധി. ജംഷഡ്​പുർ എഫ്​സി കോച്ചായി ഖാലിദിന് തുടരാനാകില്ല. മുൻ കോച്ച്​ മനോലോ മാർക്വസ്​ ദേശീയ ടീമിനൊപ്പം എഫ്​സി ഗോവയുടെ ചുമതലയും വഹിച്ചിരുന്നു.

അരങ്ങേറ്റം 
തജിക്കിസ്ഥാനെതിരെ

ആഗസ്​ത്​ 29നാണ്​ ഇന്ത്യൻ കോച്ചായുള്ള ഖാലിദ്​ ജമീലിന്റെ അരങ്ങേറ്റം. എതിരാളി തജിക്കിസ്ഥാനാണ്​. അവിടെ നടക്കുന്ന കാഫ (സെൻട്രൽ ഏഷ്യൻ ഫുട്​ബോൾ അസോസിയേഷൻ) നേഷൻസ്​ കപ്പിലാണ്​ ഇന്ത്യ കളിക്കുന്നത്​. കരുത്തരായ എതിരാളികളാണ്​. സെപ്​തംബർ ഒന്നിന്​ ഇറാനെയും നാലിന്​ അഫ്ഗാനിസ്ഥാനെയും നേരിടും.

ഇന്ത്യൻ@25

ദേശീയ ഫുട്ബോൾ ടീമിന്റെ കോച്ചാകുന്ന 25–ാമനാണ്​ ഖാലിദ്​. 1948ൽ ബാലയ്​ദാസ്​ ചാറ്റർജിയാണ്​ ആദ്യമായി ഇ‍ൗ സ്ഥാനം വഹിക്കുന്നത്​. ഇതിഹാസ പരിശീലകൻ സയ്​ദ്​ അബ്​ദുൾ റഹീമിന്​ കീഴിലാണ്​ ഇന്ത്യ എക്കാലത്തെയും മികച്ച പ്രകടനം നടത്തിയത്​. 1951മുതൽ 1962വരെ ടീമിനെ നയിച്ച ഹൈദരാബാദുകാരൻ രണ്ട്​ ഏഷ്യൻ ഗെയിംസിൽ സ്വർണം സമ്മാനിച്ചു. കഴിഞ്ഞ 25 വർഷത്തിനിടെ 10 പേർ ഇന്ത്യൻ കോച്ചിന്റെ ചുമതലവഹിച്ചിട്ടുണ്ട്​.