നാടകീയം ഇന്റർ; ഫ്‌ളുമിനെൻസിനും ഡോർട്ട്മുണ്ടിനും മിന്നും ജയം

ന്യൂയോർക്ക്‌: ഫിഫ ക്ലബ് വേൾഡ് കപ്പിൽ കരുത്തരായ ഇന്റർ മിലാന് നാടകീയ ജയം. ജപ്പാൻ ക്ലബ്ബ് ഉർവ റെഡ്‌ ഡയമണ്ട്‌സിനോട് കളിയുടെ അവസാന നിമിഷം നേടിയ ​ഗോളിലാണ് ചാമ്പ്യൻസ്‌ ലീഗ്‌ റണ്ണറപ്പുകൾ ജയിച്ചു കയറിയത്. ഒരു ​ഗോളിന് പിന്നിൽ നിന്ന ശേഷമായിരുന്നു ജയം. തുടർച്ചയായ രണ്ട് തോൽവികളോടെ ഉർവ റെഡ്‌ ഡയമണ്ട്‌സ് ടൂർണമെന്റിൽ നിന്ന് പുറത്തായി.

ആദ്യ കളിയിൽ സിഎഫ്‌ മോണ്ടെറിയോട് സമനില വഴങ്ങിയ ഇന്ററിന് ജയം അനിവാര്യമായിരുന്നു. എന്നാൽ കളി തുടങ്ങി 11-ാം മിനിറ്റിൽ റിയോമ വതനെബ ഉർവ റെഡ്‌ ഡയമണ്ട്‌സിനായി ​ഗോൾ നേടി. കളിയിൽ 82 ശതമാനം പന്തടക്കമുണ്ടായിട്ടും ആദ്യപകുതിയിൽ ഇന്ററിനെ ​ഗോളടിക്കാൻ സമ്മതിക്കാതെ ജപ്പാൻ ക്ലബ് തളച്ചു. രണ്ടാം പകുതിയിൽ 78-ാം മിനിറ്റിൽ ക്യാപ്റ്റൻ ലൗട്ടാരോ മാർട്ടിനെസാണ് ടീമിന് സമനില നേടി കൊടുത്തത്.

മത്സരം സമനിലയിൽ അവസാനിക്കുമെന്ന് തോന്നിച്ച നിമിഷം 20കാൻ കാർബോണി 92-ാം മിനിറ്റിൽ വിജയ ഗോൾ നേടുകയായിരുന്നു. ജയത്തോടെ രണ്ട് മത്സരങ്ങളിൽ നിന്ന് ഒരു ജയവും ഒരു സമനിലയുമായി നാല് പോയിന്റോടെ ഗ്രൂപ്പ് ഇയിൽ ഇന്റർ രണ്ടാമതായി. അത്രതന്നെ പോയിന്റുള്ള അർജന്റീൻ ക്ലബ് റിവർ പ്ലേറ്റ് ആണ് ഒന്നാമത്. റിവർപ്ലേറ്റും മോൺറ്റെറിയും തമ്മിലുള്ള മത്സരം ​ഗോൾ രഹിത സമനിലയിൽ കലാശിക്കുകയായിരുന്നു.

​ഗ്രൂപ്പ് എഫിൽ ബ്രസീലിയൻ ക്ലബ് ഫ്‌ളുമിനെൻസും ജർമനിയുടെ ബൊറൂസിയ ഡോർട്ട്‌മുണ്ടും തകർപ്പൻ ജയം നേടി. ദക്ഷിണ കൊറിയൻ ക്ലബ് ഉൽസൻ എച്ച്‌ഡിയെ രണ്ടിനെതിരെ നാലു ​ഗോളുകൾക്കാണ് മുൻ ബ്രസീൽ ക്യാപ്റ്റൻ തിയാഗോ സിൽവയുടെ ഫ്‌ളുമിനെൻസ് തകർത്തത്. ദക്ഷിണാഫ്രിക്കൻ ക്ലബ് മമലോഡി സൺഡൗൺസിനോട് ഡോർട്ട്‌മുണ്ട് പൊരുതി ജയിക്കുകയായിരുന്നു. മൂന്നിനെതിരെ നാലു ​ഗോളുകൾക്കായിരുന്നു ജയം.

ഉൽസൻ എച്ച്‌ഡിയുമായുള്ള മത്സരത്തിൽ ഫ്‌ളുമിനെൻസാണ് ആദ്യ ​ഗോൾ നേടിയത്. എന്നാൽ ഒന്നാം പകുതിയിൽ തന്നെ രണ്ടു ​ഗോൾ തിരിച്ചടച്ച് ഉൽസൻ കരുത്ത് കാട്ടി. 27-ാം മിനിറ്റിൽ ജോൺ ഏരിയാസാണ് ഫ്‌ളുമിനെൻസിനായി ആദ്യ ​ഗോൾ നേടിയത്. എന്നാൽ 37-ാം മിനിറ്റിൽ ലീ ജിൻ-ഹ്യുനും 45+3 -ാം മിനിറ്റിൽ ഉം വോൺ സാങും ഉൽസൻ എച്ച്‌ഡിയ്ക്കായി ​ഗോൾ നേടി. നൊനാറ്റോ (66), ജുവാൻ പാബ്ലോ ഫ്രെയ്റ്റ്സ് (83), കെനോ (90+2) എന്നിവർ നിശ്ചിത ഇടവേളകളിലായി ഫ്‌ളുമിനെൻസിനായി ​ഗോൾ നേടി. ഇതോടെ നാലുപോയന്റുമായി ​ഗ്രൂപ്പ് എഫിൽ ടീം ഒന്നാമതെത്തി. അത്രയും പോയന്റുള്ള ബൊറൂസിയ രണ്ടാം സ്ഥാനത്താണ്.