ക്ലബ് ലോകകപ്പ്: പ്രീക്വാർട്ടറിൽ മെസി പിഎസ്ജിക്കെതിരെ; പോർടോയും അത്‌ലറ്റിക്കോയും പുറത്ത്

ഫ്ലോറിഡ: ഫിഫ ക്ലബ് ലോകകപ്പ് പ്രീക്വാർട്ടറിൽ ലയണൽ മെസിയുടെ ഇന്റർ മയാമി ചാമ്പ്യൻസ് ലീ​ഗ് ജേതാക്കളായി പിഎസ്ജിയെ നേരിടും. സ്പാനിഷ് കരുത്തരായ അത്‌ലറ്റിക്കോ മാഡ്രിഡും പോർച്ചുഗൽ ക്ലബ് പോർടോയും പ്രീക്വാർട്ടർ കാണാതെ പുറത്തായി. ​ഗ്രൂപ്പ് എയിൽ ഒന്നാം സ്ഥാനത്തെത്താനുള്ള സുവർണാവസരം നഷ്ടമാക്കിയാണ് ഇന്റർ മയാമി നോക്കൗട്ടിലേക്കെത്തുന്നത്. അവസാന മത്സരത്തിൽ രണ്ട് ​ഗോളിന് ലീഡ് ചെയ്ത മയാമി അവസാന പത്ത് മിനിറ്റിൽ ബ്രസീലിയൻ ക്ലബ് പൽമിറാസിനോട് രണ്ട് ​ഗോൾ വഴങ്ങി സമനിലയിലാവുകയായിരുന്നു. ഇതോടെ പ്രീക്വാർട്ടറിൽ പൽമിറാസ് ബ്രസീലിയൻ ക്ലബായ ബോട്ടാഫെഗോയെ നേരിടും.

കരുത്തരായ പോർച്ചുഗൽ ക്ലബ് പോർടോയെ പരാജയപ്പെടുത്തിയ കരുത്തുമായാണ് ഇന്റർ മയാമി അവസാന മത്സരത്തിലും പന്തു തട്ടിയത്. കളിയുടെ തുടക്കത്തിൽ തന്നെ ടീം ലീഡ് നേടി. 16-ാം മിനിററിൽ ടി അലൻഡെയാണ് ടീമിനായി ​ഗോൾ നേടിയത്. രണ്ടാം പകുതിയിൽ 65-ാം മിനിറ്റിൽ ലുയിസ് സുവാരസിലൂടെ മയാമി ലീഡ് ഉയർത്തി. എന്നാൽ അവസാന നിമിഷത്തെ ബ്രസീലിയൻ കരുത്തിന് മുന്നിൽ മയാമിക്ക് അടിയറവ് പറയേണ്ടി വന്നു. 80-ാം മിനിറ്റിൽ പൗളിഞ്ഞോയും 87-ാം മിനിറ്റിൽ മൗറീസിയോയും പാൽമിറാസിന് വേണ്ടി ​ഗോൾ നേടി. ഈ സമനിലയോടെ പാൽമെറാസിനും ഇന്റർ മയാമിക്കും അഞ്ചു പോയിന്റ് വീതമായി. എന്നാൽ ഗോൾ വ്യത്യാസത്തിൽ പാൽമെറാസ് ഗ്രൂപ്പിൽ ഒന്നാമതെത്തുകയായിരുന്നു. ​ഗ്രൂപ്പ് എയിലെ ഈജിപ്‌ത്യൻ ക്ലബ്‌ അൽ അഹ്‌ലാൽ അവസാന മത്സരത്തിൽ യൂറോപ്യൻ ചാമ്പ്യൻമാരായ പോർടോയെ സമനിലയിൽ പൂട്ടി. ഇരു ടീമുകളും നാലു ​ഗോളുകൾ വീതം നേടി.

​ഗ്രൂപ്പ് ബിയിലെ അവസാന മത്സരത്തിൽ അമേരിക്കൻ ക്ലബ് സ്‌റ്റീൽ സൗണ്ടേഴ്‌സിനെ 2-0 ന് പരാജയപ്പെടുത്തിയാണ് പിഎസ്ജിയുടെ പ്രീക്വാർട്ടർ പ്രവേശനം. മത്സരത്തിന്റെ 35-ാം മിനിറ്റിൽ കവിച കവാറസ്‌ഹെലിയ ടീമിനെ മുന്നിലെത്തിച്ചു. 66-ാം മിനിറ്റിൽ ഹക്കിമിയുടെ വകയായിരുന്നു രണ്ടാം ​ഗോൾ. മറ്റൊരു മത്സരത്തിൽ ബ്രസീലിയൻ ക്ലബ് ബോട്ടാഫെഗോയെ ഒരു ​ഗോളിന് പരാജയപ്പെടുത്തിയെങ്കിലും അത്‍ലറ്റികോ മാഡ്രിഡിന് രക്ഷയുണ്ടായില്ല. ഇരുടീമുകൾക്കും ആറു വീതം പോയന്റായപ്പോൾ ​ഗോൾവ്യത്യാസത്തിലാണ് ഡിയഗോ സിമിയോണിയുടെ സംഘം പ്രീക്വാർട്ടർ കാണാതെ പുറത്തായത്.