ലാ ലി​ഗയിൽ വിജയവഴിയിൽ ബാഴ്സലോണ; വലൻസിയയെ തോൽപ്പിച്ചത് 7-1ന്

ബാഴ്സലോണ : ലാ ലി​ഗയിൽ വിജയവഴിയിൽ തിരിച്ചെത്തി ബാഴ്സലോണ. വലൻസിയയെ 7-1ന് തോല്‌പ്പിച്ചാണ് കറ്റാലൻ പടയുടെ വിജയം. വിജയത്തോടെ 47 പോയിന്റുമായി പട്ടികയിൽ മൂന്നാംസ്ഥാനത്ത് തുടരുകയാണ് ബാഴ്സ. ഒന്നാംസ്ഥാനത്തുള്ള റയലുമായുള്ള വ്യത്യാസം 7 പോയിന്റായി കുറയ്ക്കുകയും ചെയ്തു. അത്ലറ്റിക്കോ മാഡ്രിഡാണ് രണ്ടാം സ്ഥാനത്ത്.

കളിയിൽ കറ്റാലൻ പടയുടെ സമ്പൂർണ ആധിപത്യമായിരുന്നു. 24 മിനിറ്റിനുള്ളിൽ തന്നെ ബാഴ്സ പട നാല് ​ഗോളുകൾ വലൻസിയ വലയിലെത്തിച്ചു. മൂന്നാം മിനിറ്റിൽ ആദ്യ ​ഗോൾ നേടി ഫ്രാങ്കി ഡിയോങ്ങാണ് ​ഗോൾ വേട്ട തുടങ്ങിയത്. പിന്നീട് ഫെറാൻ ടോറസ് (8), റഫീഞ്ഞ്യ (14), ഫെർമിൻ ലോപസ് (24) എന്നിവർ വല കുലുക്കി. ആദ്യ പകുതിയുടെ അധിക സമയത്ത് ഫെർമിൻ രണ്ടാം ​ഗോൾ നേടി.

രണ്ടാം പകുതിയിൽ പകരക്കാരനായി ഇറങ്ങിയ റോബർട്ട് ലെവൻഡോവ്‌സ്‌കിയും 66-ാം മിനിറ്റിൽ സ്‌കോർ ചെയ്തു. സീസർ തരേഗയുടെ സെൽഫ് ​ഗോളോടെ ബാഴ്‌സ പട്ടിക പൂർത്തിയാക്കി. ഹ്യൂഗോ ഡ്യൂറോയുടെ വകയായിരുന്നു വലൻസിയയുടെ ആശ്വാസ ഗോൾ.