പ്രീമിയർ ലീഗിൽ ജയത്തോടെ തുടങ്ങി ലിവർപൂൾ

ലണ്ടൻ: ഇംഗ്ലീഷ് പ്രീമിയർ ലീഗിൽ നിലവിലെ ചാമ്പ്യന്മാരായ ലിവർപൂൾ ജയത്തോടെ തുടങ്ങി. ബോണിമ‍ൗത്തിനെ രണ്ടിനെതിരെ നാലു ​ഗോളുകൾക്കാണ് ലിവർപൂൾ തകർത്തത്. കളിയവസാനിക്കാൻ മിനിറ്റുകൾ ബാക്കി നിൽക്കെ നേടിയ രണ്ടു ​ഗോളുകളാണ് ചാമ്പ്യന്മാർക്ക് വിജയം സമ്മാനിച്ചത്.

ഇരുപതാം കിരീടം ചൂടിയ ലിവർപൂളിനായിരുന്ന വിജയസാധ്യത. കളിയുടെ ആദ്യ പകുതിയിൽ തന്നെ ലീഡ് നേടി ടീം കരുത്തു കാട്ടി. 37-ാം മിനിറ്റിൽ ഹ്യൂഗോ എകിടികെയിലൂടെയാണ് ലിവർപൂൾ മുന്നിലെത്തിയത്. രണ്ടാം പകുതിയുടെ തുടക്കത്തിൽ 49-ാം മിനിറ്റിൽ കോഡി ഗാക്‌പോ ലീഡ് ഉയർത്തി. എന്നാൽ അന്റോയ്ൻ സെമെന്യോ ഇരട്ട​ഗോളുമായി ബോണിമ‍ൗത്തിന് സമനില നേടി കൊടുത്തു. 64-ാം മിനിറ്റിലും 76-ാം മിനിറ്റിലുമായിരുന്നു ​ഗോൾ.

കളി സമനിലയിലേക്ക് നീങ്ങുമെന്ന് പ്രതീക്ഷിച്ചടത്തു നിന്നാണ് 88-ാം മിനിറ്റിൽ ഫെഡറിക്കോ കിയേസ ലിവർപൂളിനായി ​ഗോൾ കണ്ടെത്തിയത്. പിന്നാലെ ഇഞ്ചുറി ടൈമിന്റെ നാലാം മിനിറ്റിൽ സ്‌കോർ ചെയ്ത മുഹമ്മദ് സലാ ടീമിന്റെ ജയം ഉറപ്പാക്കി.