'ദോഫാർ എ നാച്ചുറൽ ഹിസ്റ്ററി വണ്ടർ' പ്രദർശനം ഉദ്ഘാടനം ചെയ്തു

മസ്‌കത്ത്‌ / സലാല: സലാലയിലെ മ്യൂസിയം ഓഫ് ദി ഫ്രാങ്കിൻസെൻസ് ലാൻഡിൽ "ദോഫാർ എ നാച്ചുറൽ ഹിസ്റ്ററി വണ്ടർ" എന്ന പേരിൽ സംഘടിപ്പിക്കുന്ന പ്രദർശനം ഞായറാഴ്ച ഉദ്ഘാടനം ചെയ്തു. മസ്കത്തിലെ നാച്ചുറൽ ഹിസ്റ്ററി മ്യൂസിയത്തിന്റെയും ദോഫാർ ഗവർണറേറ്റിലെ മ്യൂസിയം ഓഫ് ദി ഫ്രാങ്കിൻസെൻസ് ലാൻഡിന്റെയും സഹകരണത്തോടെ പൈതൃക, ടൂറിസം മന്ത്രാലയമാണ് പ്രദർശനം സംഘടിപ്പിക്കുന്നത്. പരിസ്ഥിതി ഏജൻസി ചെയർമാൻ ഡോ. അബ്ദുല്ല അലി അൽ അമ്രിയുടെ ആഭിമുഖ്യത്തിൽ ആരംഭിച്ച പ്രദർശനം ഓഗസ്റ്റ് 31 വരെ നീണ്ടുനിൽക്കും.

ഗവർണറേറ്റിലെ വിലായത്തുകളിൽ വളരുന്ന വിവിധ സസ്യങ്ങൾക്കൊപ്പം ലോകമെമ്പാടും കാണപ്പെടുന്ന അപൂർവ വന്യജീവികളുടെ വൈവിധ്യവും ദോഫാറിന്റെ പർവത, സമുദ്ര പരിസ്ഥിതികളും പ്രദർശനത്തിലുണ്ട്. ദോഫാറിന്റെ പ്രകൃതി ചരിത്രത്തെക്കുറിച്ചുള്ള ശാസ്ത്രീയ ശേഖരവും ഇതിൽ ഉൾപ്പെടുന്നു. പരിസ്ഥിതി സംരക്ഷണ അവബോധം വർദ്ധിപ്പിക്കുക, പ്രകൃതിവിഭവങ്ങൾ സംരക്ഷിക്കേണ്ടതിന്റെ പ്രാധാന്യം എടുത്തുകാണിക്കുക,

എല്ലാ പ്രായത്തിലുമുള്ള സന്ദർശകർക്ക് വിദ്യാഭ്യാസപരവും വിനോദപരവുമായ ഒരു വേദി നൽകുക എന്നിവയാണ് പ്രദർശനത്തിന്റെ ലക്ഷ്യമെന്ന് മ്യൂസിയം ഓഫ് ഫ്രാങ്കിൻസെൻസ് ലാൻഡ് ഡയറക്ടർ ഉസാമ മുഹമ്മദ് അൽ റോവാസ് പറഞ്ഞു.

ആഗോള വിനോദസഞ്ചാര കേന്ദ്രമെന്ന നിലയിൽ ഗവർണറേറ്റിന്റെ പങ്ക് സജീവമാക്കുക എന്നതാണ് പ്രദർശനത്തിന്റെ ലക്ഷ്യം. ഒമാനി ഐഡന്റിറ്റിയെ പിന്തുണയ്ക്കുന്നതിനും പ്രാദേശിക പ്രകൃതി പൈതൃകം രേഖപ്പെടുത്തുന്നതിനും ശാസ്ത്രീയ ഗവേഷണത്തിനും അക്കാദമിക്, കമ്മ്യൂണിറ്റി സ്ഥാപനങ്ങളുമായുള്ള സഹകരണത്തിനും അവസരങ്ങൾ വളർത്തിയെടുക്കുന്നതിനും പ്രദർശനം സംഭാവന ചെയ്യുന്നുണ്ടെന്നും അദ്ദേഹം അഭിപ്രായപ്പെട്ടു.