print edition വികസനപക്ഷത്ത്‌ 
നിലയുറപ്പിച്ച്‌ പത്തനംതിട്ട

പത്തനംതിട്ട

എൽഡിഎഫ്‌ സർക്കാരിന്റെ തുടർഭരണം സമ്മാനിച്ച വികസനവും കരുതലും പത്തനംതിട്ടയെ വീണ്ടും വികസനപക്ഷത്ത്‌ ഉറപ്പിക്കുന്നു. ആ ആത്മവിശ്വാസമാണ്‌ തദ്ദേശതെരഞ്ഞെടുപ്പിൽ എൽഡിഎഫ്‌ പ്രയാണത്തിന്‌ ആക്കംകൂട്ടുന്നതും. മികവുറ്റ സ്ഥാനാർഥികളെ അവതരിപ്പിച്ചതും യുവജനങ്ങളുടെ പ്രാതിനിധ്യം പതിന്മടങ്ങാക്കിയതും എതിർക്യാന്പ്‌ പോലും സ്വാഗതം ചെയ്‌തു. ജില്ലാ പഞ്ചായത്തിൽ മുപ്പതും അതിൽ താഴെയും പ്രായമുള്ള മൂന്നുപേരും 40ൽ താഴെയുള്ള ആറുപേരും മത്സരിക്കുന്നു. അനുഭവസന്പത്തുള്ളവരുടെ നീണ്ടനിരയും പട്ടികയ്‌ക്ക്‌ തിളക്കമായി.

യുഡിഎഫ്‌, എൻഡിഎ മുന്നണികളെ വിമതശല്യം വിട്ടൊഴിഞ്ഞിട്ടില്ല. കോൺഗ്രസിന്റെയും ബിജെപിയുടെയും അഖിലേന്ത്യ, സംസ്ഥാന നേതൃത്വംവരെ ഇടപെട്ടിട്ടും പഞ്ചായത്ത്‌ വാർഡുകളിലെ കലഹം പോലും പരിഹരിക്കാനായില്ല. യുഡിഎഫിൽ സീറ്റുകൾ നേതാക്കൾ വീതംവച്ചെന്ന ആക്ഷേപം ശക്തം. യൂത്ത്‌ കോൺഗ്രസുകാർ പാടേ അവഗണിക്കപ്പെട്ടു. യുവജന നേതാക്കളടക്കം നിരവധി പേർ വിമതൻമാരായുണ്ട്‌. മല്ലപ്പള്ളി ബ്ലോക്ക്‌ പഞ്ചായത്ത്‌ പുന്നവേലി ഡിവിഷനിൽ കടുത്ത എതിർപ്പുകളെ അവഗണിച്ച്‌ കെപിസിസി രാഷ്‌ട്രീയകാര്യ സമിതിയംഗം പി ജെ കുര്യൻ കൊണ്ടുവന്ന സ്ഥാനാർഥിയുടെ പത്രിക തള്ളിയതോടെ ഡമ്മിയെ പിന്തുണയ്ക്കേണ്ട ഗതികേടിലാണ്‌ യുഡിഎഫ്‌.

കോൺഗ്രസുമായുള്ള ഡീൽ വ്യക്തമാക്കി മുപ്പതോളം വാർഡിൽ ബിജെപി സ്ഥാനാർഥിയെ നിർത്തിയിട്ടില്ല. കവിയൂരിൽ ബിജെപിക്കായി കോൺഗ്രസ്‌ അവരുടെ തെക്കൻ ജില്ലയിലെ പ്രധാന ഘടകകക്ഷിയായ കേരള കോൺഗ്രസ്‌ ജോസഫ്‌ ഗ്രൂപ്പ്‌ സ്ഥാനാർഥിയുടെ പത്രികാ സമർപ്പണംതന്നെ അട്ടിമറിച്ചു.

മലയോര ഹൈവേ, നിലയ്‌ക്കൽ കുടിവെള്ള പദ്ധതി, രാജ്യത്താകെ മാതൃകയായ കുന്നന്താനം മാലിന്യ സംസ്‌കരണപ്ലാന്റ്‌, കോന്നി മെഡിക്കൽ കോളേജ്‌, കൊടുമൺ സ്റ്റേഡിയം, പത്തനംതിട്ട ജനറൽ ആശുപത്രിയിൽ കാത്ത്‌ലാബ്‌, ബഹുനില സ്‌കൂൾ മന്ദിരങ്ങൾ, പെരുന്തേനരുവി ജലവൈദ്യുതപദ്ധതി തുടങ്ങി നാടിന്റെ മുഖച്ഛായ മാറ്റിയ വികസനപ്രവർത്തനങ്ങളും എങ്ങും ചർച്ചയാണ്‌. വാർഡ്‌ പുനർവിഭജനത്തിൽ 57 വാർഡാണ്‌ ജില്ലയിൽ വർധിച്ചത്‌. 1042 എന്നത്‌ 1099 ആയി.