print edition ഒപ്പമുണ്ടെന്ന ഉറപ്പ് ; കേരളം വീണ്ടും മാതൃക സൃഷ്‌ടിക്കുന്നു

നെഞ്ചുകലങ്ങിയ വാക്കുകൾ കേരള മനഃസാക്ഷിക്ക് മുന്നിൽ ഉത്തരംതേടി 
നിൽക്കുന്നുണ്ട്‌. ഉള്ളുലയ്ക്കുന്ന ക്രൂരതയുടെ കഥകൾ കാതുകളിൽ പതിക്കുന്നു. 
ഏതു കുറ്റവാളിയും നിയമത്തിന്റെ മുന്നിലെത്തുമെന്ന ഉറപ്പാണ് സ്ത്രീസുരക്ഷയുടെ അടിത്തറ. എന്നും എവിടെയും മുന്നേറാൻ പെൺകരുത്തിന്‌ നാടിന്റെ പിന്തുണയുണ്ട്‌. തോറ്റുപോയെന്ന്‌ തോന്നുന്നിടത്തുനിന്ന്‌ പൊരുതിക്കയറാൻ സംവിധാനമൊരുക്കി സർക്കാർ ഒപ്പമുണ്ട്‌. 
തദ്ദേശഭരണസമിതികളിൽ 50 ശതമാനം വനിതാസംവരണം കൊണ്ടുവന്ന കേരളം വീട്ടമ്മമാർക്ക് മാസംതോറും ധനസഹായം ഉറപ്പാക്കി വീണ്ടും മാതൃക സൃഷ്‌ടിക്കുന്നു...

തിരുവനന്തപുരം

ജീവിതത്തിനും മരണത്തിനും ഇടയിലെ നേർത്ത ഇടവേളയിൽ, എവിടെയോ വായിച്ചുപോയ ആ നമ്പർ അവളുടെ മനസിലുടക്കി. ധൈര്യം സംഭരിച്ച്‌ അതിലേക്ക്‌ വിളിച്ചു. ആ ഒറ്റ നിമിഷമാണ്‌ ജീവിതത്തിലേക്കുള്ള തിരിച്ചുവരവിന്‌ പിടിവള്ളിയായത്‌. 181... മറുതലയ്ക്കല്‍ ഫോണെടുത്ത കൗണ്‍സിലര്‍ സംസാരിച്ചു. ഒപ്പമുണ്ടെന്ന് ഉറപ്പുനല്‍കി. അവിടെയവള്‍ മനസുതുറന്നു. പ്രാണന്‍ പകുത്തുനല്‍കിയവനിൽ നിന്നേറ്റ ആഘാതം.

അവളറിയാതെ പകര്‍ത്തിയ സ്വകാര്യനിമിഷങ്ങള്‍ പലര്‍ക്കും അയച്ചുകൊടുക്കുമെന്നുള്ള ഭീഷണി. ഭയന്ന അവള്‍ ഫോണ്‍കോളുകള്‍ക്ക് മറുപടി നല്‍കിയില്ല. ഇതോടെ അവളുടെ നഗ്നദൃശ്യങ്ങള്‍ അവന്‍‌ സുഹൃത്തിന് അയച്ചു. അവൾ ആത്മഹത്യയ്ക്ക് ശ്രമിച്ചെങ്കിലും വിജയിച്ചില്ല. പലദിവസങ്ങളിലെ കൗണ്‍സലിങ്ങിലൂടെ പെണ്‍കുട്ടിക്ക് ധൈര്യം നല്‍കി. ഒടുവില്‍ കൗണ്‍സലര്‍, ഗ്രൂപ്പ് കോള്‍ മുഖേന സൈബര്‍സെല്ലിലും വനിതാ ഹെല്‍പ്പ്-ലൈനിലും പരാതി നല്‍കിപ്പിച്ചു. അവനെ പൊലീസ് കസ്റ്റഡിയിലെടുത്തു. കൈവശമുണ്ടായിരുന്ന തെളിവുകളെല്ലാം നശിപ്പിച്ചു. അവള്‍ ഓക്കെയായി എന്നുറപ്പാകുന്ന വരെ പിന്തുണച്ചു.

സംസ്ഥാന വനിതാ വികസന കോർപറേഷന്റെ "മിത്ര 181-' പദ്ധതിയില്‍ 4.5 ലക്ഷത്തിലധികം കേസുകളാണ് ഫലപ്രാപ്തിയിൽ എത്തിച്ചത്. കൗൺസലിങ്, നിയമോപദേശം, അടിയന്തര സംരക്ഷണം തുടങ്ങിയ സഹായങ്ങളാണ് 24 മണിക്കൂറും ലഭ്യമാക്കുന്നത്.

സ്‌ത്രീകൾക്ക്‌ സുരക്ഷാ പെൻഷന്‌ 3800 കോടി

രാജ്യത്ത്‌ ആദ്യമായി 35നും 60നും ഇടയിൽ പ്രായമുള്ള സ്‌ത്രീകൾക്കായി പ്രത്യേക സുരക്ഷാ പെൻഷൻ പ്രഖ്യാപിച്ച്‌ ചരിത്രം കുറിച്ചിരിക്കുകയാണ്‌ കേരളം. നവംബറിൽ നിലവിൽവന്ന പദ്ധതിയിലൂടെ 31.34 ലക്ഷം പേർക്ക്‌ ആയിരം രൂപ വീതം പ്രതിമാസം ലഭിക്കും. മറ്റ്‌ സാമൂഹ്യക്ഷേമ പദ്ധതികളുടെ ഗുണഭോക്താക്കളാകാത്ത എഎവൈ, പിങ്ക്‌ കാർഡുകളിൽ ഉൾപ്പെടുന്ന സ്‌ത്രീകൾക്കാണ്‌ പ്രയോജനം. അപേക്ഷ ഓൺലൈൻവഴിയാണ്‌ നൽകേണ്ടത്‌. വർഷം 3,800 കോടിയാണ് സർക്കാർ ചെലവിടുക.

നിര്‍ഭയ കേരള 
സുരക്ഷിത കേരളം

സ്ത്രീകള്‍ക്കും കുട്ടികള്‍ക്കുമെതിരെയുള്ള അതിക്രമങ്ങള്‍ തടയാനും സുരക്ഷയ്ക്കുമായി ജില്ലാടിസ്ഥാനത്തിലാണ് നിര്‍ഭയകേരളം സുരക്ഷിതകേരളം പദ്ധതി. 205 വളന്റിയര്‍മാരെ തെരഞ്ഞെടുത്ത് പരിശീലനം നല്‍കി പൊലീസ് സ്റ്റേഷന്‍ പരിധിയില്‍ നിയമിച്ചു.

സഖി വണ്‍ സ്റ്റോപ്പ് സെന്റര്‍

ശാരീരികവും മാനസികവും ലൈംഗികവുമായ അതിക്രമങ്ങള്‍ നേരിടുന്നവര്‍ക്കായി സഖി വണ്‍ സ്റ്റോപ്പ് കേന്ദ്രം. അതിജീവിതകള്‍ ആശുപത്രി, പൊലീസ് സ്റ്റേഷന്‍, അഭയകേന്ദ്രങ്ങള്‍, കൗണ്‍സിലിങ് സ്ഥാപനങ്ങള്‍ തുടങ്ങിയ പലയിടങ്ങളില്‍ കയറുന്നത് ഒഴിവാക്കാനാണിത്‌.

​സുരക്ഷയ്ക്ക് ഐസിസി

തൊഴിലിടങ്ങളില്‍ സ്ത്രീസുരക്ഷ ഉറപ്പാക്കാന്‍ വനിതകള്‍ അംഗങ്ങളായി ആഭ്യന്തര പരാതിപരിഹാര സമിതി (ഐസിസി) രൂപീകരിച്ചു. കുറഞ്ഞത് രണ്ട് സ്ത്രീകളെങ്കിലുമുണ്ടെങ്കില്‍ മാത്രം അവരുടെ സമ്മതപ്രകാരം രാത്രി ഒമ്പതിനും രാവിലെ ആറിനും ഇടയില്‍ ജോലിക്ക് നിയോഗിക്കാം, താമസസ്ഥലത്തേക്ക് യാത്ര സൗകര്യവും ഉറപ്പാക്കണമെന്നതും നിയമത്തിലൂടെ കൊണ്ടുവന്നു.

​