മികച്ച പരിപാലനത്തിന്‌ ആദരം

പത്തനംതിട്ട 

ശുചിത്വ മിഷൻ നടത്തിയ ലോക ശുചിമുറിദിന ക്യാമ്പയിൻ 2024 സമാപിച്ചു. ക്യാമ്പയിൻ സമാപനത്തിന്റെ ഭാ​ഗമായി ജില്ലാ പഞ്ചായത്ത് പ്രസിഡന്റ് രാജി പി രാജപ്പൻ ജില്ലയിലെ ഐഎച്ച്എച്ച്എൽ (വ്യക്തി​ഗത ​ഗാർഹിക ശൗചാലയം) ​ഗുണഭോക്താക്കളെ ആദരിച്ചു. മികച്ച രീതിയിൽ പരിപാലിക്കുന്ന പൊതു ശൗചാലയങ്ങൾക്കുളള ആദരം ​ബ്ലോക്ക്/ ​ഗ്രാമപഞ്ചായത്ത് പ്രതിനിധികൾ ജില്ലാ പഞ്ചായത്ത് പ്രസിഡന്റിൽനിന്ന് ഏറ്റുവാങ്ങി.

2024 നവംബർ 16ന് തുടങ്ങിയ ക്യാമ്പയിൻ കാലയളവിൽ നിരവധി പുതിയ ​അപേക്ഷകരെ പത്തനംതിട്ട ശുചിത്വ മിഷൻ ഐഎച്ച്എച്ച്എൽ പദ്ധതിയുടെ ഭാ​ഗമാക്കി. ജില്ലയിലെ ബ്ലോക്ക് പഞ്ചായത്തുകളും ​ഗ്രാമപഞ്ചായത്തുകളും പോസ്റ്റർ പ്രകാശനം, ക്ലീനിങ്‌ ഡ്രൈവ്, ശുചീകരണ തൊഴിലാളികൾക്കുള്ള ആദരം തുടങ്ങി നിരവധി പരിപാടികൾ നടത്തി ക്യാമ്പയിന്റെ ഭാ​ഗമായിരുന്നു. 

കോഴഞ്ചേരി സ്റ്റേഡിയം ജങ്‌ഷൻ ടേക്ക് എ ബ്രേക്ക്, പന്തളം കുളനട ടേക്ക് എ ബ്രേക്ക്, ആറന്മുള ടേക്ക് എ ബ്രേക്ക്, നെടുമ്പ്രം ടേക്ക് എ ബ്രേക്ക്, ഇരവിപേരൂർ ടേക്ക് എ ബ്രേക്ക് എന്നിവയ്ക്കാണ് ക്യാമ്പയിൻ കാലയളവിൽ മികച്ച പൊതുശൗചാലങ്ങൾക്കുളള ആദരം ലഭിച്ചത്. ജില്ലാ ശുചിത്വ മിഷൻ അസിസ്റ്റന്റ് കോ ഓർഡിനേറ്റർ (ഐഇസി) അനൂപ് ശിവശങ്കരപ്പിള്ള, ശുചിത്വ മിഷൻ ഡിഇഒ ജെയിംസ് ജോർജ്‌, ശുചിത്വ മിഷൻ റിസോഴ്സ് പേഴ്സൺ അശ്വതി എന്നിവർ പങ്കെടുത്തു.