ആ ഭാഗ്യവാൻ ദിനേഷ്‌കുമാർ

കരുനാഗപ്പള്ളിക്ക്‌ ഇത്‌ 
ഹാട്രിക്‌ ബമ്പർ

കരുനാഗപ്പള്ളി

കേരള സംസ്ഥാന ലോട്ടറിയുടെ ബമ്പർ ഭാഗ്യം ഇത് മൂന്നാം തവണയാണ് കരുനാഗപ്പള്ളിയെ തേടിയെത്തുന്നത്. ഇത്തവണ തൊടിയൂർ സ്വദേശി ദിനേശ് കുമാറിനാണ്‌ 12 കോടിയുടെ പൂജാ ബമ്പർ ലഭിച്ചത്. ഓണം ബമ്പർ തുക 12 കോടിയായി വർധിപ്പിച്ചശേഷം ആദ്യ സമ്മാനം കരുനാഗപ്പള്ളിയിലായിരുന്നു അടിച്ചത്. 2019 സെപ്തംബർ 19ന് നറുക്കെടുത്ത ഓണം ബമ്പർ  കരുനാഗപ്പള്ളി ചുങ്കത്ത് ജ്വല്ലറിയിലെ ജീവനക്കാർ കൂട്ടായി പണമിട്ട് എടുത്ത ടിക്കറ്റിനാണ് ലഭിച്ചത്. 2021 സെപ്തംബർ 19ന് വീണ്ടും ഓണം ബമ്പർ കരുനാഗപ്പള്ളിയിലെ ഏജൻസി വിറ്റ ടിക്കറ്റിനു കിട്ടി. എന്നാൽ, ടിക്കറ്റെടുത്തത്‌ തൃപ്പൂണിത്തുറക്കാരനായിരുന്നു. കരുനാഗപ്പള്ളി ലോട്ടറി സബ് ഓഫീസിൽനിന്നു കോട്ടയത്തെ മീനാക്ഷി ലക്കിസെന്റർ വാങ്ങിയ ടിക്കറ്റുകളിൽ ഒന്നിനാണ് ഒന്നാം സമ്മാനം ലഭിച്ചത്. ടിഇ 645465 എന്ന നമ്പരിനാണ് സമ്മാനം ലഭിച്ചത്. ഫലത്തിൽ കരുനാഗപ്പള്ളിയിൽനിന്നു വിതരണംചെയ്ത ടിക്കറ്റാണെങ്കിലും സമ്മാനം ലഭിക്കാൻ അന്ന് കരുനാഗപ്പള്ളിക്കാർക്കു ഭാഗ്യമുണ്ടായില്ല. തങ്ങളുടെ തൃപ്പൂണിത്തുറയിലെ ഔട്ട്‌ലെറ്റിൽനിന്നു വിറ്റ ടിക്കറ്റിനാണ് സമ്മാനം അടിച്ചതെന്ന് മീനാക്ഷി ലക്കി സെന്റർ ഉടമ മുരുകേഷ് പറഞ്ഞു. നേരത്തെ 2010ലും തങ്ങൾക്ക് രണ്ടുകോടി ഒന്നാം സമ്മാനം ലഭിച്ചിരുന്നതായും 40 വർഷത്തോളമായി ഈ രംഗത്ത് പ്രവർത്തിക്കുന്ന മുരുകേഷ് പറഞ്ഞു. 2019ലെ ഓണം ബമ്പർ കൂടാതെ 2019 നവംബറിൽ പൗർണമി ടിക്കറ്റിന്റെ ഒന്നാം സമ്മാനമായ 70ലക്ഷവും കരുനാഗപ്പള്ളിയിലെ അതിഥിത്തൊഴിലാളിക്കു ലഭിച്ചിരുന്നു. കരുനാഗപ്പള്ളിയിൽ ബമ്പർ നേടുന്ന ഭാഗ്യവാന്മാരുടെ പരമ്പര ഇപ്പോഴും തുടരുന്നു.