ബാഫ്റ്റ പുരസ്കാരം: കോൺക്ലേവ് മികച്ച ചിത്രം, ബ്രൂട്ടലിസ്റ്റിന് നാല് അവാർഡ്

ലണ്ടൻ : 78ാമത് ബ്രിട്ടിഷ് അക്കാദമി ഫിലിം അവാർഡുകൾ (ബാഫ്റ്റ- BAFTA) പ്രഖ്യാപിച്ചു. എഡ്വാർഡ് ബെർജറിന്റെ കോൺക്ലേവാണ് മികച്ച ചിത്രം. ഒരു ഡസനിലധികം വിഭാ​ഗത്തിലേക്ക് നോമിനേറ്റ് ചെയ്യപ്പെട്ട ചിത്രം നാല് പുരസ്കാരങ്ങളാണ് നേടിയത്. മികച്ച ചിത്രത്തിനു പുറമെ മികച്ച ബ്രിട്ടിഷ് ചിത്രം, മികച്ച അവലംബിത തിരക്കഥ, എഡിറ്റിങ് എന്നീ പുരസ്കാരങ്ങളും ചിത്രം നേടി.

ബ്രാഡി കോർബെറ്റ് സംവിധാനം ചെയ്ത പീരീഡ് ഡ്രാമ ദ ബ്രൂട്ടലിസ്റ്റും നാല് അവാർഡുകൾ നേടി പുരസ്കാരവേദിയിൽ തിളങ്ങി. ബ്രാഡി കോർബെറ്റ് മികച്ച സംവിധായകനുള്ള പുരസ്കാരം നേടി. ചിത്രത്തിലെ അഭിനയത്തിന് അഡ്രിയൻ ബ്രോഡി മികച്ച നടനുള്ള അവാർഡ് കരസ്ഥമാക്കി. മികച്ച സിനിമറ്റോ​ഗ്രഫി, മികച്ച സം​ഗീതം എന്നിവയ്ക്കുള്ള അവാർഡും ബ്രൂട്ടലിസ്റ്റിനാണ്.

അനോറയിലെ കേന്ദ്ര കഥാപാത്രത്തെ അവതരിപ്പിച്ച മൈക്കി മാഡിസണാണ് മികച്ച നടി. ജാക്വസ് ഔഡിയാർഡിന്റെ മ്യൂസിക്കൽ ഡ്രാമ എമിലിയ പെരെസ് രണ്ട് പുരസ്കാരങ്ങൾ നേടി. മികച്ച സഹനടിയായി സോയ് സൽദാന തിരഞ്ഞെടുക്കപ്പെട്ടു. വാലസ് ആൻഡ് ​ഗ്രോമിറ്റ്: വെൻജിയൻസ് മോസ്റ്റ് ഫൗൾ ആണ് മികച്ച അനിമേഷൻ ചിത്രം.