ത്രസിപ്പിച്ച് 'അവതാർ: ഫയർ ആൻഡ് ആഷ്' ട്രെയിലർ; ഡിസംബറിൽ തിയറ്ററുകളിൽ

പ്രേക്ഷകരെ വിസ്മയിപ്പിക്കാൻ ത്രസിപ്പിക്കുന്ന രം​ഗങ്ങളൊരുക്കി അവതാർ- 3 എത്തുന്നു. വിഖ്യാത സംവിധായകൻ ജെയിംസ് കാമറൂണിന്റെ അവതാർ പരമ്പരയിലെ മൂന്നാം ചിത്രമായ അവതാർ: ഫയർ ആൻഡ് ആഷിന്റെ ട്രെയിലർ പുറത്തിറങ്ങി. ചടുലമായ രം​ഗങ്ങളോടെയുള്ള ട്രെയിലറിൽ പുതിയൊരു കഥാപരിസരമാണ് കാണുന്നത്. ചിത്രം ഡിസംബർ 19ന് തിയറ്ററുകളിലെത്തും. ഇംഗ്ലീഷ്, ഹിന്ദി, തമിഴ്, തെലുങ്ക്, മലയാളം, കന്നഡ ഭാഷകളിൽ ചിത്രം ഇന്ത്യയിൽ റിലീസ് ചെയ്യും.

ബ്ലോക്ബസ്റ്റർ ചിത്രങ്ങളുടെ സംവിധായകനായ കാമറൂണിന്റെ മറ്റൊരു ബ്ലോക്ബസ്റ്റർ തന്നെയാവും അവതാർ 3 എന്നാണ് സിനിമാപ്രേമികളുടെ വിലയിരുത്തൽ. 2009ലാണ് ആദ്യചിത്രമായ അവതാർ പുറത്തിറങ്ങിയത്. ഡിസംബർ 19-ന് റിലീസ് ചെയ്ത 3-ഡി സയൻസ്-ഫിക്ഷൻ ചലച്ചിത്രമായ അവതാർ ട്വന്റിയത്ത് സെഞ്ച്വറി ഫോക്സാണ് വിതരണം ചെയ്തത്. ധാതുക്കളാൽ സമ്പന്നമായ പാൻഡോറ എന്ന അത്ഭുത​ഗ്രഹത്തിൽ ജീവിക്കുന്ന നാവി എന്ന മനുഷ്യസാദൃശ്യമുള്ള വിഭാ​ഗത്തിന്റെയും അവരിലേക്ക് കടന്നുചെല്ലുന്ന മനുഷ്യരുടെയും കഥ പറഞ്ഞ അവതാർ നിരൂപക- പ്രേക്ഷക പ്രശംസ നേടി ബോക്സോഫീസിൽ ഹിറ്റായി. ആൽഫ സെന്റൗറി നക്ഷത്രവ്യവസ്ഥയിലെ ഉപഗ്രഹമായ പാൻഡോറയിൽ നിന്നും അമൂല്യ ധാതുവായ അനോബ്റ്റാനിയം ഖനനം ചെയ്യാൻ റിസോഴ്‌സ് ഡെവലപ്‌മെന്റ് അഡ്മിനിസ്‌ട്രേഷൻറെ (ആർഡിഎ) നേതൃത്വത്തിൽ സംഘമെത്തുന്നതിലൂടെയാണ് കഥ പുരോ​ഗമിക്കുന്നത്.

273മില്യൺ ബജറ്റിലൊരുങ്ങിയ ചിത്രം 2.923 ബില്യണാണ് നേടിയത്. ഇതുവരെ ലോകത്ത് ഏറ്റവുമധികം കലക്ഷൻ നേടിയ ചിത്രമാണ് അവതാർ. 16 വർഷമായി അവതാർ ഈ റെക്കോർഡിൽ തുടരുകയാണ്. തുടർന്ന് 2022 ഡിസംബറിൽ രണ്ടാം ഭാ​ഗമായ അവതാർ: ദി വേ ഓഫ് വാട്ടർ റിലീസ് ചെയ്തു. അവതാറിലെ കഥാനായകൻ ജേക്ക് സള്ളിയും നാവി കുടുംബവും പൻഡോറയിൽ നിന്ന് പലായനം ചെയ്യുന്നതും മനുഷ്യരിൽ നിന്ന് ഭീഷണിയുണ്ടാകുമ്പോൾ യുദ്ധത്തിലൂടെ പ്രതിരോധിക്കുന്നതുമാണ് രണ്ടാം ഭാ​ഗത്തിന്റെ ഇതിവൃത്തം. 2.32 ബില്യൺ നേടി ഏറ്റവുമധികം പണം വാരിയ ചിത്രങ്ങളുടെ പട്ടികയിൽ അവതാർ: ദി വേ ഓഫ് വാട്ടർ മൂന്നാമതെത്തി. ഈ റെക്കോർഡുകൾ അവതാർ : ഫയർ ആൻഡ് ആഷ് തകർക്കുമോ എന്നാണ് കണ്ടറിയേണ്ടത്.