പുസ്​തകപ്പുര വളർത്തിയ വായനലഹരി

തൃശൂർ

കുട്ടികൾക്കിടയിൽ വായനലഹരി പടർത്തിയ പുസ്​തകപ്പുരയിലെ വായനക്കാരുടെ രചനകൾ പുസ്​തകമായി പുറത്തിറങ്ങി. കുട്ടികളെ വായനയിലേക്ക്​ നയിക്കുക എന്ന ലക്ഷ്യത്തോടെ തൃശൂർ ജില്ലയിലാരംഭിച്ച പുസ്​തകപ്പുര പദ്ധതിയിലെ രചനകളാണ്​ ‘വായനാലഹരി’ എന്ന പേരിൽ പുറത്തിറങ്ങിയത്​. പുസ്​തകപ്പുര വാട്സാപ്​ ഗ്രൂപ്പിൽ കുട്ടികൾ പങ്കുവച്ച 258 കുറിപ്പുകളിൽനിന്ന്​ തെരഞ്ഞെടുത്ത 40 കുറിപ്പുകളാണ്​ വായനലഹരിയിലുള്ളത്. കുട്ടികൾക്കിടയിൽ വായനശീലം വളർത്തുന്നതിന് തൃശൂർ ജില്ലയിൽ മൂന്നുവർഷമായി പ്രവർത്തിക്കുന്ന പ്രസ്ഥാനമാണ് പുസ്തകപ്പുര. അഭിമുഖം വഴി വായന അഭിരുചി മനസ്സിലാക്കിയാണ് കുട്ടികളെ തെരഞ്ഞെടുത്തത്​. ജില്ലയിലെ 90 ശതമാനം പഞ്ചായത്തുകളിലും പുസ്തകപ്പുര അംഗങ്ങളുണ്ട്. തെരഞ്ഞെടുക്കുന്ന കുട്ടികൾക്ക്​ 50 പുസ്തകം സൗജന്യമായി നൽകും.അഞ്ചു ഘട്ടമായാണ് പുസ്തകം നൽകുക. ഓരോ ഘട്ടത്തിലും നൽകുന്ന 10 പുസ്തകങ്ങൾ വായിച്ച്​ കുറിപ്പു നൽകണം. എന്നാലേ അടുത്ത ഘട്ടത്തിലേയ്ക്ക്​ കടക്കാനാവൂ. ജില്ലയുടെ വിവിധ ഭാഗങ്ങളിൽവച്ചു നടന്ന പുസ്തക വിതരണങ്ങളിൽ എഴുത്തുകാർ, മന്ത്രിമാർ, സാംസ്കാരിക പ്രവർത്തകർ അധ്യാപകർ എന്നിവർ പങ്കെടുത്തു. എഴുത്തുകാരനും സാംസ്കാരിക പ്രവർത്തകനുമായ ഡോ. എൻ ആർ ഗ്രാമപ്രകാശ് ചെയർമാനായ കമ്മിറ്റിയാണ്​ പ്രവർത്തനങ്ങൾക്കു നേതൃത്വം നൽകുന്നത്​. വായനയെ സ്നേഹിക്കുന്ന നിരവധി പേരാണ്​ പുസ്തകങ്ങൾ നൽകാൻ സഹായിക്കുന്നത്​. വീടുകളിൽ ഒരു കൊച്ചു വായനശാലയുടെ പ്രവർത്തനമാണ് സങ്കല്പം. കുട്ടികൾ വീട്ടിൽ പുസ്തകങ്ങളുടെ രജിസ്റ്റർ സൂക്ഷിക്കുകയും വായിക്കാൻ താല്പര്യമുള്ളവർക്കു നൽകി തിരിച്ചു വാങ്ങുകയും ചെയ്യുന്നു. വായനശീലമുള്ള കുട്ടികൾക്കു ഗ്രേസ് മാർക്ക് നൽകുകയെന്ന ആവശ്യം വിദ്യാഭ്യാസ മന്ത്രിക്ക്​ നൽകിയ നിവേദനത്തിൽ പുസ്തകപ്പുര ആവശ്യപ്പെട്ടിട്ടുണ്ട്.