പേവിഷ ബാധയേറ്റ് 
3 പശുക്കൾ ചത്തു

അരിമ്പൂർ

അരിമ്പൂരിൽ കുറുനരിയുടെ ആക്രമണത്തിൽ പേവിഷ ബാധയേറ്റ് മൂന്ന്​ പശുക്കൾ ചത്തു. കൈപ്പിള്ളി വീട്ടിൽ സിദ്ധാർഥന്റെ രണ്ടും കിഴക്കുപുറത്ത് ഉണ്ണിക്കൃഷ്ണന്റെ ഒരു പശുവുമാണ്​ ചത്തത്. കഴിഞ്ഞ എട്ടിന് വൈകിട്ട് മൂന്നരയോടെയാണ് പശുക്കൾക്ക് കടിയേറ്റത്. ഉടനെ പഞ്ചായത്തിലെ മൃഗഡോക്ടറെത്തി പേവിഷബാധയ്ക്കുള്ള നാല് കുത്തിവയ്​പുകൾ നൽകിയെങ്കിലും തിങ്കളാഴ്​ച രാവിലെയോടെ പശുക്കൾ ചത്തു. അമ്പതിനായിരം രൂപ വിലവരുന്ന പശുക്കളായിരുന്നു. ക്ഷീരകർഷക അവാർഡ് ഉൾപ്പെടെ നേടിയ സിദ്ധാർഥൻ കഴിഞ്ഞ 35 വർഷമായി ഇ‍ൗ മേഖലയിലുണ്ട്​. ഉണ്ണിക്കൃഷ്ണൻ കഴിഞ്ഞ 13 വർഷമായി ക്ഷീര കർഷകനാണ്. ഇവരെല്ലാം ക്ഷീരസംഘങ്ങളിൽ പാൽ വിൽക്കുന്നവരാണ്​. പശുക്കൾ ചത്തതോടെ വലിയ സാമ്പത്തിക നഷ്ടമാണ് ഉണ്ടായിരിക്കുന്നത്. കർഷകർക്കുണ്ടായ സാമ്പത്തിക നഷ്ടം പരിഹരിക്കാൻ ദുരന്തനിവാരണ വിഭാഗത്തിലുൾപ്പെടുത്തി നഷ്ടപരിഹാരം നൽകാനുള്ള നടപടികൾ സ്വീകരിച്ചതായി പഞ്ചായത്ത് പ്രസിഡന്റ്​ സ്മിത അജയകുമാർ, വൈസ് പ്രസിഡന്റ്​ സി ജി സജീഷ് എന്നിവർ പറഞ്ഞു. പഞ്ചായത്തംഗം കെ കെ ഹരിദാസ് ബാബു, വെറ്ററിനറി ഡോക്ടർമാരായ രാധിക ശ്യാം, അലക്സ് എന്നിവർ വീടുകളിലെത്തി നടപടികൾക്ക് നേതൃത്വം നൽകി.