340 കുടുംബങ്ങൾക്ക് സുരക്ഷിത ഭവനങ്ങളൊരുക്കി പഞ്ചായത്ത്​ വെറും ലൈഫല്ല തളിക്കുളം കരുതൽ സി എസ്​ സുനിൽ തളിക്കുളം ലൈഫ്​ പദ്ധതിയിൽ ജില്ലയിൽ ഏറ്റവും കൂടുതൽ വീടുകൾ നിർമിച്ചുനൽകിയ പഞ്ചായത്തുകളിലൊന്നാണ്​​ തളിക്കുളം​. ലൈഫിൽ 340 കുടുംബങ്ങൾക്ക് വാസസ‍‍ൗകര്യമൊരുക്കി കരുതലിന്റെ പര്യായമായി തളിക്കുളം മാറി. - വീടില്ലാത്ത പാവപ്പെട്ട കുടുംബങ്ങൾക്ക് സുരക്ഷിത ഭവനം ഒരുക്കുക എന്നതായിരുന്നു എൽഡിഎഫ് ഭരണസമിതിയുടെ ലക്ഷ്യം. ഗ്രാമ പഞ്ചായത്ത്, ബ്ലോക്ക് പഞ്ചായത്ത്, ജില്ലാ പഞ്ചായത്ത് എന്നിവയുടെ പരമാവധി ഫണ്ടുകളും ഗവൺമെന്റ്​ അംഗീകൃത ലോണായ ഹഡ്​കോ ലോണും ഉപയോഗപ്പെടുത്തിയാണ് വീടുകൾ നൽകിയത്. വിവിധ ഘട്ടങ്ങളിലായി പണിനിലച്ച വീടുകളുടെ നിർമാണം പൂർത്തീകരിക്കലായിരുന്നു ആദ്യഘട്ടം. 37 വീടുകളാണ് ഒന്നാം ഘട്ടത്തിൽ പൂർത്തിയാക്കിയത്. രണ്ടാം ഘട്ടത്തിൽ 104 ഗുണഭോക്താക്കളാണുണ്ടായിരുന്നത്​. ഇതിൽ എസ്​സി വിഭാഗത്തിലുള്ള 26 പേർക്കും ജനറൽ വിഭാഗത്തിൽ 78 പേർക്കും വീടുകൾ നൽകി. എസ്​സി, ഫിഷറീസ് വകുപ്പുകളിൽ നിന്ന് ലഭിച്ച അഡീഷണൽ ലിസ്റ്റ് പ്രകാരം അഞ്ചു വീടുകൾ കൂടി നൽകി. മൂന്നാം ഘട്ടത്തിൽ 51 പേർക്ക് ഭവന നിർമാണത്തിന് ധനസഹായം നൽകി. ലൈഫ് ട്വന്റി ട്വന്റി പ്രകാരം ജനറൽ വിഭാഗത്തിന്​ 105 വീടും എസ്​സി വിഭാഗത്തിന് 46 വീടും ഫിഷറീസ് വിഭാഗത്തിന് 12 വീടും ഉൾപ്പെടെ 163 വീടുമാണ്​ ​ നൽകിയത്​. ലൈഫ് രണ്ട്​, മൂന്ന്​ ഘട്ടവും ട്വന്റി ട്വന്റി പ്രകാരവും ഭൂമിയില്ലാത്ത 75 ഗുണഭോക്താക്കൾക്ക് ഭൂമിയും നൽകി കരുതലിന്റെ മാതൃകയാവുകയാണ്​ തളിക്കുളം പഞ്ചായത്ത്​.