കുതിപ്പോടെ എസ്ഐഎഫ്എൽ ​

അത്താണി (തൃശൂർ)

ഹെലികോപ്റ്റർ നിർമാണ പ്രക്രിയയിലേക്ക് ആവശ്യമായ ഫോർജിങ്സുകളുടെ തദ്ദേശീയവൽക്കരണത്തിൽ നൽകിയ മികച്ച സംഭാവനയ്ക്ക് എസ്ഐഎഫ്എല്ലിന് ഹിന്ദുസ്ഥാൻ എയ്റോനോട്ടിക്സ് ലിമിറ്റഡിന്റെ അംഗീകാരം. പ്രതിരോധ, ബഹിരാകാശ മേഖലകളിൽ അധിഷ്ഠിതമായ പ്രമുഖ പൊതുമേഖലാ കമ്പനിയായ സ്റ്റീൽ ആൻഡ് ഇൻഡസ്ട്രിയൽ ഫോർജിങ്​ ലിമിറ്റഡ്​ രാജ്യത്തെ മുൻനിര കമ്പനിയായി കുതിക്കുകയാണ്​. ​ ബംഗളൂരുവിൽ നടന്ന ചടങ്ങിൽ എച്ച്​എഎൽ ഡയറക്ടർ ജനറൽ ഡോ. കെ രാജലക്ഷ്​മി മേനോനിൽ നിന്നും എസ്ഐഎഫ്എൽ എംഡി കമാൻഡർ പി സുരേഷ് പുരസ്കാരം ഏറ്റുവാങ്ങി. വ്യോമസേനയുടെ യുദ്ധവിമാനങ്ങളുടെ നിർമാണത്തിന്​ ആവശ്യമായ ഫോർജിങ് ഘടകങ്ങൾ മൂന്ന് പതിറ്റാണ്ടായി എച്ച്എഎല്ലിന് എസ്ഐഎഫ്എൽ നിർമിച്ചു നൽകിവരുന്നു. 1992മുതൽ 200ൽപ്പരം ഫോർജിങ്സുകൾ തദ്ദേശീയമായി വികസിപ്പിച്ചു. ടൈറ്റാനിയം അലോയ്, ഇൻകോണൽ അലോയ്, ഡബ്ലുഎഎസ്​പി അലോയ്, മാരേജിങ്​ സ്റ്റീൽ, അലുമിനിയം അലോയ്, എയ്റോ എൻജിനുകളുടെ ഹൈ നിക്കൽ അലോയ് എന്നിവ ഉപയോഗിച്ച് ക്ലോസ്റ്റ് ഡൈ ഫോർജഡ് ഘടകങ്ങളാണ്​ വിതരണം ചെയ്യുന്നത്​. അഡോർ എൻജിനുകൾ, അറ്റ്യൂസ്​റ്റ്​, ഓർഫിയസ്, ഡാർട്ട്​, ഗാരറ്റ്, കാവേരി എന്നി എൻജിനുകൾ, എൽസിഎ എയർക്രാഫ്റ്റ്, ജാഗ്വാർ എയർക്രാഫ്റ്റ്, ലൈറ്റ് കോംബാറ്റ് ഹെലികോപ്റ്റർ, അഡ്വാൻസ്റ്റ് ലൈറ്റ് ഹെലികോപ്റ്റർ, തുടങ്ങിയവയിലേക്കുള്ള നിർണായക ഫോർജിങ്‌സുകൾ എസ്​ഐഎ----ഫ്​എൽ വികസിപ്പിച്ചവയാണ്. തൃശൂർ, അത്താണി ആസ്ഥാനമായുള്ള എസ്​ഐഎഫ്​എൽ പ്രതിരോധം, എയ്റോസ്പേസ്, ഓയിൽ ആൻഡ്​​ ഗ്യാസ് ഓട്ടോമൊബൈൽ, റെയിൽവേ മേഖലകൾക്കായി ഫോർജിങ്​സ്​ നിർമിക്കുന്നു. ഐഎസ്ആർഒ ഡിആർഡിഒ ബ്രഹ്മോസ് എയ്റോസ്പേസ് ലിമിറ്റഡ്, ഇന്ത്യൻ നേവി തുടങ്ങിയക്കും വിവിധതരം ഫോർജിങ്​സുകൾ നൽകി വരുന്നു. രണ്ട്​ വർഷമായി സംസ്ഥാന സർക്കാർ നൽകിയ സാമ്പത്തിക സഹായത്തിൽ 23 കോടി രൂപയുടെ ആധുനീകവൽക്കരണം പൂർത്തീകരിച്ചു. ആറ് ടൺ ഓപ്പൺ ഹാമ്മർ പുതുതായി സ്ഥാപിച്ചു. മന്ത്രി പി രാജീവിന്റെ ഇടപെടലുകളും കമ്പനിയുടെ വളർച്ചയ്​ക്ക് മുതൽക്കൂട്ടായി​. ഈ സാമ്പത്തിക വർഷം 92 കോടി രൂപയുടെ വിറ്റുവരവും അഞ്ചുവർഷത്തിനകം 200 കോടി വിറ്റുവരവുമാണ് കമ്പനി ലക്ഷ്യമിടുന്നതെന്ന്​ ചെയർമാൻ അഡ്വ. ഷെറിഫ് മരയ്ക്കാർ, എംഡി കമാൻഡർ പി സുരേഷ് എന്നിവർ അറിയിച്ചു.