ഇരിങ്ങാലക്കുട ട‍ൗൺ ബാങ്ക്​ 45 കോടി നഷ്ടത്തിൽ

സ്വന്തം ലേഖകൻ

തൃശൂർ

റിസർവ്​ ബാങ്ക്​ നടപടി നേരിട്ട​ കോൺഗ്രസ്​ ഭരണസമിതിയിലുള്ള ഇരിങ്ങാലക്കുട ട‍ൗൺ അർബൻ കോ–ഓപ്പറേറ്റീവ് സഹകരണ ബാങ്ക്​ മൂന്നുവർഷം തുടർച്ചയായി നഷ്ടത്തിൽ. ഇ‍ൗ വർഷം 45 കോടിയാണ്​ നഷ്ടം. നിലവിൽ 10 ശാഖകൾ നഷ്ടത്തിലാണ്. ഇതാണ്​ ആർബിഐയുടെ കടുത്ത നടപടിക്ക്​ വിധേയമായത്​. ഇരിങ്ങാലക്കുട ഹെഡ്​ ഓഫീസും ജില്ലയിലാകെ 18 ശാഖകളിലായി ബാങ്കിന്​ 35,000-ത്തോളം നിക്ഷേപകരുണ്ട്. കെപിസിസി സെക്രട്ടറി എം പി ജാക്​സനാണ്​ 39 വർഷമായി ബാങ്ക്​ ചെയർമാൻ. ദീർഘകാലമായി തുടരുന്ന നേതൃത്വം സ്വാർഥ താൽപ്പര്യങ്ങൾക്കായി ബാങ്കിനെ വിനിയോഗിച്ചതായാണ്​ കണ്ടെത്തൽ. അർബൻ ബാങ്കായതിനാൽ റിസർവ് ബാങ്കിന്റെ നിയന്ത്രണത്തിലാണ്​ ബാങ്ക്​ പ്രവർത്തിക്കുന്നത്​. 1000 കോടിയിൽ കൂടുതൽ നിക്ഷേപമുള്ളതിനാലാണ്​ കടുത്ത നിയന്ത്രണങ്ങൾ ഏർപ്പെടുത്തിയത്​. 365 കോടിയുടെ നിഷ്​ക്രിയ ആസ്​തികളുണ്ട്​. വായ്​പാ കുടിശ്ശിക ഇനത്തിൽ ബാങ്കിന്​ 195 കാേടി ലഭിക്കാനുണ്ട്​. വഴിവിട്ട വായ്​പകൾ നൽകിയതാണ്​ ഇതിന്​ വഴിവച്ചതെന്ന്​ റിസർവ്​ ബാങ്ക്​ പരിശോധനയിൽ കണ്ടെത്തിയിരുന്നു. ബാങ്ക്​ പരിധിക്കപ്പുറത്ത്​ വായ്​പകൾ നൽകി. കൃത്യമായ ഇ‍ൗടില്ലാതെയാണ്​ ഭൂമി പണയം വച്ച്​ വായ്​പകൾ നൽകിയത്​. തിരിച്ചടവില്ലാതായതോടെ ബാങ്ക്​ നഷ്ടത്തിലേക്ക്​ കൂപ്പുകുത്തി. ആവശ്യമില്ലാതെ ഗ്രാമങ്ങളിൽ പോലും ബ്രാഞ്ചുകൾ തുറന്നു. നിയമനങ്ങൾ നടത്തി ലക്ഷങ്ങൾ കൈപ്പറ്റുകയായിരുന്നു ഇതിനു പിന്നിലെ പ്രധാന ലക്ഷ്യം. പല ബ്രാഞ്ച്​ കെട്ടിടങ്ങൾക്കും വൻവാടകയാണ്​. ഭരണസമിതി അംഗങ്ങൾക്ക്​ തൽപ്പര്യമുള്ളവരെ താൽക്കാലിക ജീവനക്കാരായി നിയമിച്ചു. ഇതെല്ലാം നഷ്ടം വർധിപ്പിക്കാൻ ഇടവരുത്തി. ഭരണസമിതിയുമായി നിരന്തരം ആർബിഐ അധികൃതർ ബന്ധപ്പെട്ടിട്ടും തിരുത്തൽ നടപടി ഉണ്ടായില്ല. ഇതോടെയാണ്​ കടുത്തനടപടികളിലേക്ക്​ കടന്നത്​. ബാങ്കിന്റെ നിക്ഷേപങ്ങളും വായ്​പകളും ആറുമാസത്തേക്ക്​ ആർബിഐ മരവിപ്പിച്ചു. ബാങ്ക്​ എടിഎം, ഓൺലൈൻ ആപ്​ എന്നിവയുടെ പ്രവർത്തനവും മരവിപ്പിച്ചു. നിക്ഷേപകർക്ക്​ പരമാവധി 10000 രൂപ വരെയാണ്​ പിൻവലിക്കാനാവുക. സ്ഥിരം നിക്ഷേപകർക്ക്​ പരമാവധി അഞ്ചുലക്ഷം രൂപവരെയാണ്​ ലഭിക്കുക. ബാങ്കിന്റെ സാമ്പത്തികസ്ഥിതി മെച്ചപ്പെടുന്നതുവരെ നിയന്ത്രണങ്ങൾ തുടരും. വെള്ളിയാഴ്​ച ബാങ്ക് ബ്രാഞ്ചുകളിൽ നിക്ഷേപകർ തടിച്ചുകൂടിയിരുന്നു. നിക്ഷേപം തിരികെ ലഭിക്കാതായതോടെ ബഹളമായി.